വിദേശം
അമേരിക്കന് കര്ദ്ദിനാള് ലിയോ പതിനാലാമന് പുതിയ ഇടയന്
വത്തിക്കാന്: ഫ്രാന്സിസ് മാര്പാപ്പയുടെ പിന്ഗാമിയായി അമേരിക്കന് കര്ദ്ദിനാള് റോബര്ട്ട് പ്രെവോസ്റ്റിനെ (69) തിരഞ്ഞെടുത്തു. ആഗോള കത്തോലിക്ക സഭയുടെ പുതിയ പരമാദ്ധ്യക്ഷനായ പ്രെവോസ്റ്റ് ഇനി ലിയോ പതിനാലാമന് മാര്പാപ്പ എന്നാകും അറിയപ്പെടുക. മാര്പാപ്പ സ്ഥാനത്തെത്തുന്ന ആദ്യ അമേരിക്കക്കാരനാണ് അദ്ദേഹം.
വത്തിക്കാനിലെ സിസ്റ്റീന് ചാപ്പലില് തുടങ്ങിയ കര്ദ്ദിനാള്മാരുടെ കോണ്ക്ലേവിന്റെ നാലാം റൗണ്ട് വോട്ടെടുപ്പിലാണ് ലിയോ മാര്പാപ്പയെ ആഗോള കത്തോലിക്ക സഭയുടെ 267 -ാം പരമാദ്ധ്യക്ഷനായി തിരഞ്ഞെടുത്തത്. സിസ്റ്റീന് ചാപ്പലിന്റെ ചിമ്മിനിയില് നിന്ന് വെളുത്ത പുക ഉയര്ന്നതോടെയാണ് പുതിയ പാപ്പയെ തിരഞ്ഞെടുത്തെന്ന വിവരം ലോകം അറിഞ്ഞത്. വിവിധ രാജ്യങ്ങളില് നിന്നെത്തിയ ആയിരക്കണക്കിന് വിശ്വാസികള് ചരിത്ര മുഹൂര്ത്തത്തിന് സാക്ഷിയായി.
വെളുത്ത പുക പ്രത്യക്ഷപ്പെട്ടതിന് പിന്നാലെ മുതിര്ന്ന കര്ദ്ദിനാള് ഡീക്കന് സെന്റ് പീറ്റേഴ്സ് ബസിലിക്കയുടെ ബാല്ക്കണിയിലെത്തി പുതിയ പാപ്പയെ തിരഞ്ഞെടുത്ത വിവരം പ്രഖ്യാപിച്ചു. അതുവരെ ആകാംക്ഷ അടക്കി കാത്തുനിന്ന വിശ്വാസികള് പ്രാര്ത്ഥനയോടെ ലിയോ മാര്പാപ്പയെ വരവേറ്റു. ബാല്ക്കണിയില് പ്രത്യക്ഷപ്പെട്ട അദ്ദേഹം വിശ്വാസി സമൂഹത്തെ ആശിര്വദിച്ചു.
ബുധനാഴ്ചയാണ് പുതിയ മാര്പാപ്പയെ തിരഞ്ഞെടുക്കാനുള്ള കോണ്ക്ലേവ് സിസ്റ്റീന് ചാപ്പലില് തുടങ്ങിയത്.
133 കര്ദ്ദിനാള്മാരാണ് വോട്ടെടുപ്പില് പങ്കെടുത്തത്. ഇവര്ക്ക് പുറംലോകവുമായി ബന്ധപ്പെടാന് അനുവാദമുണ്ടായിരുന്നില്ല. മൂന്നില് രണ്ട് വോട്ട് (89 വോട്ട്) നേടുന്നയാളെയാണ് മാര്പാപ്പയായി തിരഞ്ഞെടുക്കുന്നത്.
ഫ്രാന്സിസ് മാര്പാപ്പയും ബെനഡിക്ട് പതിനാറാമനും കോണ്ക്ലേവിന്റെ രണ്ടാം ദിനമാണ് തിരഞ്ഞെടുക്കപ്പെട്ടത്. അതേസമയം, ജോണ് പോള് രണ്ടാമന് മൂന്നാം ദിനമാണ് തിരഞ്ഞെടുക്കപ്പെട്ടത്.
|
