യുകെ മലയാളി സമൂഹത്തിനു വേദനയായി മലയാളി പെണ്കുട്ടിയുടെ മരണം. ലുക്കീമിയ ചികിത്സയിലിരുന്ന പെണ്കുട്ടിയാണ് മരണമടഞ്ഞത്. ന്യൂകാസിലിന് സമീപം ബെഡ്ലിങ്ടണില് താമസിക്കുന്ന മാത്യു വര്ഗീസ് - ജോമോള് മാത്യു ദമ്പതികളുടെ മകള് ജോന എല്സ മാത്യു (14) ആണ് മരിച്ചത്. എറണാകുളം ജില്ലയിലെ പിറവം പേപ്പതി ഇല്ലിക്കല് കുടുംബാംഗമാണ് ജോന. ബെഡ്ലിങ്ടണ് സെന്റ് ബെനറ്റ് കാത്തലിക് സ്കൂളിലെ പത്താം ക്ലാസ് വിദ്യാര്ഥിനിയായിരുന്നു.
ജോനയ്ക്ക് എറിക് എല്ദോ മാത്യു (6) എന്ന ഒരു സഹോദരനുണ്ട്. 2022ലാണ് ജോനയുടെ അമ്മയും നഴ്സുമായ ജോമോള് മാത്യു യുകെയില് എത്തിയത്. പിന്നീട് കുടുംബവും യുകെയിലേക്ക് വന്നു. നാട്ടില് വെച്ച് ജോനയുടെ രോഗം കണ്ടെത്തി ചികിത്സ ആരംഭിച്ചിരുന്നു. 2024ല് യുകെയില് എത്തിയ ശേഷവും ചികിത്സ തുടര്ന്നു. കഴിഞ്ഞ ദിവസം ഉച്ചയ്ക്ക് ന്യൂകാസിലിലെ റോയല് വിക്ടോറിയ ഇന്ഫേര്മറി ഹോസ്പിറ്റലില് വെച്ചായിരുന്നു ജോനയുടെ മരണം.
ജോനയുടെ മൃതദേഹം നാട്ടില് സംസ്കരിക്കുവാനാണ് കുടുംബാംഗങ്ങളുടെ ആഗ്രഹം. ഇതിനായുള്ള ക്രമീകരണങ്ങള് നടക്കുന്നു. ന്യൂകാസില് സെന്റ് ഗ്രിഗോറിയോസ് യാക്കോബായ സിറിയന് ചര്ച്ച് അംഗങ്ങളായ ജോനയുടെ കുടുംബം നാട്ടില് പിറവം രാജാധിരാജ സെന്റ് മേരീസ് യാക്കോബായ കത്തീഡ്രല് ഇടവകാംഗങ്ങളാണ്.
