യുവാവിനെ കാറിന്റെ ബോണറ്റിലിരുത്തി വാഹനമോടിച്ച് കൊലപ്പെടുത്തി; സിഐഎസ്എഫ് ഉദ്യോഗസ്ഥര് അറസ്റ്റില്
വണ്ടിയ്ക്ക് സൈഡ് നല്കാത്തത് ചോദ്യം ചെയ്ത യുവവൈനെ നെടുമ്പാശ്ശേരിയില് വാഹനമിടിപ്പിച്ച് കൊലപ്പെടുത്തി. തുറവൂര് സ്വദേശി ഐവിന് ജിജോ(24)യാണ് കൊല്ലപ്പെട്ടത്. സംഭവത്തില് നെടുമ്പാശ്ശേരി വിമാനത്താവളത്തിലെ സിഐഎസ്എഫ് ഉദ്യോഗസ്ഥരെ പിടികൂടി. സിഐഎസ്എഫ് എസ് ഐ വിനയകുമാര്, കോണ്സ്റ്റബിള് മോഹന് എന്നിവരെയാണ് അറസ്റ്റ് ചെയ്തത്. ഒരു കിലോമീറ്ററോളം ബോണറ്റില് യുവാവിനെ കിടത്തി വാഹനമോടിച്ച് നിലത്ത് തള്ളിയിട്ട ശേഷം കാര് ഇടിച്ച് കൊലപ്പെടുത്തിയെന്നാണ് എഫ്ഐആര്.
എസ് ഐ വിനയകുമാറാണ് അപകടകരമായ രീതിയില് വാഹനമോടിച്ചത്. തുറവൂര് സ്വദേശി ഐവിനെ ഒരു കിലോമീറ്ററോളം ആണ് ബോണറ്റില് ഇട്ട് വാഹനം ഓടിച്ചത്. വാഹനത്തിന് സൈഡ് നല്കാത്തതിലെ തര്ക്കത്തെ തുടര്ന്നായിരുന്നു ദാരുണകൊലപാതകം. വ്യാഴാഴ്ച രാത്രി 11 മണിയോടെ നായത്തോട് വെച്ചാണ് സംഭവം.
ഐവിന് ഓടിച്ച കാറിന് വിനയകുമാര് സൈഡ് നല്കിയിരുന്നില്ല. നായത്തോട് ഭാഗത്തെത്തിയപ്പോള് സൈഡ് നല്കാത്തത് ചോദ്യം ചെയ്തു. ഇതില് പ്രകോപിതനായ വിനയകുമാര് ഐവിനെ ബോണറ്റിലിട്ട് ഒരു കിലോമീറ്ററോളം വാഹനമോടിക്കുകയായിരുന്നു. തുടര്ന്ന് വാഹനത്തിന്റെ ബോണറ്റില് നിന്ന് ജിജോ വീഴുകയായിരുന്നു. പരിക്കേറ്റ യുവാവിനെ ഉടന് ആശുപത്രിയിലെത്തിച്ചെങ്കിലും രക്ഷിക്കാനായില്ല. സംഭവത്തില് നാട്ടുകാര് പ്രതിഷേധിച്ചു.
സംഭവത്തില് രണ്ട് സിഐഎസ്എഫുകാരെയും സസ്പെന്ഡ് ചെയ്തു. കുറ്റം തെളിയുന്നപക്ഷം ഇരുവര്ക്കുമെതിരേ കടുത്ത നടപടി ഉണ്ടാകുമെന്നും സിഐഎസ്എഫ് പുറത്തിറക്കിയ വാര്ത്താക്കുറിപ്പില് പറയുന്നു.
സംഭവത്തില് സിഐഎസ്എഫ് ആഭ്യന്തര അന്വേഷണം പ്രഖ്യാപിച്ചിട്ടുണ്ട്. കേസുമായി ബന്ധപ്പെട്ട് കേരള പോലീസുമായി പൂര്ണമായും സഹകരിക്കുമെന്നും ചെന്നൈയിലെ എയര്പോര്ട്ട് സൗത്ത് സോണ് ഹെഡ്ക്വാര്ട്ടേഴ്സില് നിന്ന് ഡെപ്യൂട്ടി ഇന്സ്പെക്ടര് ജനറല് ആര്. പൊന്നി ഐപിഎസ് പുറത്തിറക്കിയ വാര്ത്താക്കുറിപ്പില് പറയുന്നു.
സി.ഐ.എസ്.എഫ്. ഉദ്യോഗസ്ഥര് മദ്യലഹരിയിലായിരുന്നു എന്നാണു സൂചന. വഴി നല്കുന്നതുമായി ബന്ധപ്പെട്ട തര്ക്കത്തെ തുടര്ന്ന് ഇവര് ഐവിനെ മനഃപൂര്വം കാറിടിപ്പിച്ച് കൊലപ്പെടുത്തുകയായിരുന്നു എന്നാണ് പോലീസിന്റെ നിഗമനം.
