അറബിക്കടലില് കേരള തീരത്ത് ചരക്കു കപ്പലില് നിന്ന് അപകടരമായ വസ്തുക്കള് അടങ്ങിയ കാര്ഗോ കണ്ടെയ്നറുകള് കടലില് പതിച്ചു. വിഴിഞ്ഞത്തു നിന്നും കൊച്ചിയിലേക്ക് പോയ ലൈബീരിയന് കപ്പലാണ് അപകടത്തില്പെട്ടതെന്ന് നാവികസേനാ വക്താവ് അറിയിച്ചു. ഇതിലുണ്ടായിരുന്ന മറൈന് ഓയിലും ചില രാസവസ്തുക്കളും ഉള്ള കണ്ടെയ്നറുകള് കടലില് വീണതിനെത്തുടര്ന്ന് ദുരന്തനിവാരണ അതോറിറ്റി ജാഗ്രതാനിര്ദേശം പുറപ്പെടുവിച്ചു. കപ്പല് ചരിയുകയായിരുന്നുവെന്നാണ് വിവരം. ഇതിലുണ്ടായിരുന്ന 24 ജീവനക്കാരില് 21 പേരെ രക്ഷപ്പെടുത്തിയിട്ടുണ്ട്. മൂന്നൂ പേര്ക്കായി രക്ഷാ പ്രവര്ത്തനം തുടരുകയാണ്.
വിഴിഞ്ഞത്ത് നിന്ന് വെള്ളിയാഴ്ച പുറപ്പെട്ട കപ്പല് കൊച്ചി തുറമുഖത്ത് കുറച്ച് ചരക്കുകള് ഇറക്കിയ ശേഷം തൂത്തുക്കുടിയിലേക്ക് പോകാനിരുന്നതാണെന്നാണ് വിവരം. രക്ഷാപ്രവര്ത്തനത്തിനായി കോസ്റ്റ്ഗാര്ഡും നേവിയും രംഗത്തുണ്ട്.
തീരത്ത് സംശയാസ്പദകരമായ നിലയിലുള്ള കണ്ടെയ്നറുകള് കണ്ടാല് അടുത്തേക്ക് പോകുകയോ ഇതില് സ്പര്ശിക്കുകയോ ചെയ്യരുതെന്ന് ദുരന്ത നിവാരണ അതോറിറ്റിയും മുന്നറിയിപ്പ് നല്കി. ഇന്ന് രാത്രി 10നാണ് കപ്പല് കൊച്ചിയില് എത്തേണ്ടിയിരുന്നത്.
നിലവില് കേരള തീരത്തിനടുത്ത് കടലില് ചരിഞ്ഞുകിടക്കുന്ന നിലയിലാണ് കപ്പല്. നാവികസേനയുടെ ഡോര്ണിയര് ഹെലികോപ്റ്ററും കോസ്റ്റ് ഗാര്ഡും രക്ഷാപ്രവര്ത്തനത്തിലുണ്ട്. മറൈന് ഗ്യാസോയില്, വെരി ലോ സള്ഫര് ഫ്യുവല് എന്നിവയാണ് കണ്ടെയ്നറുകളില് ഉള്ളതെന്നാണ് വിവരം.
കണ്ടെയ്നറുകള് കേരള തീരത്ത് അടിഞ്ഞാല് പൊതുജനം വിവരം ഉടന് 112 ല് അല്ലെങ്കില് അടുത്തുള്ള പൊലീസ് സ്റ്റേഷനില് അറിയിക്കണമെന്നുമാണ് മുന്നറിയിപ്പ്. കേരളത്തില് വടക്കന് തീരത്ത് ഇവ അടിയാനാണ് കൂടുതല് സാധ്യത. കപ്പല് അപകടത്തെ തുടര്ന്ന് കടലില് എണ്ണപ്പാട ഉണ്ടാകുന്നുണ്ട്. ആറ് മുതല് എട്ട് കണ്ടെയ്നറുകളാണ് കടലില് വീണതെന്നാണ് പ്രാഥമിക വിവരം. ഇന്നലെ വൈകീട്ട് വിഴിഞ്ഞത് നിന്ന് കൊച്ചിയിലേക്ക് പോയ ഫീഡര് കപ്പലാണിതെന്നാണ് വിവരം.
