അഹമ്മദാബാദ് വിമാന ദുരന്തത്തില് രണ്ടു വയസുള്ള കുട്ടി ഉള്പ്പെടെ പ്രദേശവാസികളായ നാലു പേരെ കാണാനില്ലെന്ന് പരാതി. ബന്ധുക്കള് നല്കിയ പരാതിയില് പൊലീസ് കേസെടുത്തു. ഇവരുടെ ബന്ധുക്കളുടെ ഡിഎന്എ സാമ്പിളുകള് ശേഖരിച്ചു. മരിച്ചവരില് ഇതുവരെ 80പേരെയാണ് ഡിഎന്എ പരിശോധനയിലൂടെ തിരിച്ചറിഞ്ഞത്. തിരിച്ചറിഞ്ഞതില് 33 പേരുടെ മൃതദേഹങ്ങള് വിട്ടു നല്കി.
വിമാന അപകടത്തില് മരിച്ച ഗുജറാത്ത് മുന് മുഖ്യമന്ത്രി വിജയ് രൂപാണിയുടെ സംസ്കാര ചടങ്ങുകള് ഇന്ന് നടക്കും. വിമാന അപകടത്തില് 274 പേരാണ് മരിച്ചതെന്നാണ് സംസ്ഥാന സര്ക്കാര് വ്യക്തമാക്കിയത്. കൂടുതല് പേരുടെ ഡിഎന്എ പരിശോധന ഇന്ന് പൂര്ത്തിയാകും. അപകടത്തില് മരിച്ച മലയാളി രഞ്ജിത നായരുടെ ഡിഎന്എ ഫലം ഇന്ന് പുറത്തു വന്നേക്കും. അപകട സ്ഥലത്ത് ഫോറന്സിക് പരിശോധന ഇന്നും തുടരും.
അതേസമയം, അഹമ്മദാബാദ് വിമാന ദുരന്തത്തെ കുറിച്ചന്വേഷിക്കാന് രൂപീകരിച്ച ഉന്നത തല സമിതിയുടെ ആദ്യ യോഗം ഇന്ന് നടക്കും. ആഭ്യന്തര സെക്രട്ടറിയുടെ നേതൃത്വത്തില് രൂപീകരിച്ച സമിതി ഇതുവരെയുള്ള അന്വേഷണം വിലയിരുത്തും. ഭാവിയില് ഇത്തരം ആവര്ത്തിക്കാതെ വ്യോമയാന മേഖലയില് സുരക്ഷ കൂടുതല് വര്ധിപ്പിക്കുന്നതിനുള്ള മാര്ഗനിര്ദ്ദേശവും നല്കും. അപകടത്തെ കുറിച്ചുള്ള റിപ്പോര്ട്ട് സമര്പ്പിക്കാന് മൂന്ന് മാസത്തെ സമയമാണ് സമിതിക്ക് നല്കിയിരിക്കുന്നത്.
