യു.കെ.വാര്‍ത്തകള്‍

ചെലവ് ചുരുക്കലിന്റെ ഭാഗമായി ബ്രിട്ടീഷ് രാജകുടുംബത്തിന്റെ റോയല്‍ ട്രെയിന്‍ 2027 ഓടെ നിര്‍ത്തലാക്കുമെന്ന് റിപ്പോര്‍ട്ട്. ഉപയോഗത്തിന്റെയും പണത്തിന്റെ മൂല്യത്തിന്റെയും അവലോകനത്തിന് ശേഷമാണ് ബക്കിംഗ്ഹാം കൊട്ടാരം തിങ്കളാഴ്ച പ്രഖ്യാപിച്ച ചെലവ് ലാഭിക്കല്‍ നടപടിയുടെ ഭാഗമായി ട്രെയിന്‍ നിര്‍ത്തലാക്കുകയാണെന്ന് അറിയിച്ചത്. 1842-ലാണ് ട്രെയിന്‍ ആരംഭിക്കുന്നത്. വിക്ടോറിയ രാജ്ഞി ഇംഗ്ലണ്ടിലെ സ്ലോയില്‍ നിന്ന് ലണ്ടന്‍ പാഡിംഗ്ടണ്‍ സ്റ്റേഷനിലേക്ക് പ്രത്യേകം നിര്‍മ്മിച്ച ട്രെയിനില്‍ യാത്ര ചെയ്തത് മുതലാണ് ഇത് രാജകുടുംബത്തിന്റെ സ്വത്തായി മാറിയത്. സ്ലീപ്പിംഗ് ക്വാര്‍ട്ടേഴ്സും ഒരു ഓഫീസും ഉള്‍പ്പെടെ ഒമ്പത് വണ്ടികളുള്ള റോയല്‍ ട്രെയിന്‍ 1977-ല്‍ എലിസബത്ത് രാജ്ഞിയുടെ രജത ജൂബിലിക്കായി അവതരിപ്പിച്ചു.

എന്നാല്‍ റോയല്‍ ഹൗസ്ഹോള്‍ഡിന്റെ വാര്‍ഷിക അക്കൗണ്ട്സ് റിപ്പോര്‍ട്ട് പ്രകാരം, ഫെബ്രുവരിയില്‍ സ്റ്റാഫോര്‍ഡ്ഷെയറിലെ രാജാവിന്റെ സന്ദര്‍ശനത്തിന് 44,822 പൗണ്ട് (61,800 ഡോളര്‍) ചിലവായി. കഴിഞ്ഞ വര്‍ഷം ആഡംബര വാഹന നിര്‍മ്മാതാക്കളായ ബെന്റ്ലിയുടെ ചെഷെയര്‍ ആസ്ഥാനത്തേക്കുള്ള മറ്റൊരു യാത്രയ്ക്ക് 33,000 പൗണ്ട് (45,700 ഡോളര്‍) അധികം ചിലവായി. ഇംഗ്ലണ്ടിലെ വോള്‍വര്‍ട്ടണിലുള്ള സുരക്ഷിത കേന്ദ്രത്തില്‍ റോയല്‍ ട്രെയിന്‍ സൂക്ഷിക്കുന്നതുമായി ബന്ധപ്പെട്ട് വലിയ ചിലവുകളുമുണ്ടാകുന്നു.

2027 ന് ശേഷവും റോയല്‍ ട്രെയിന്‍ പ്രവര്‍ത്തനക്ഷമമായി നിലനിര്‍ത്തുന്നതിന് ഭാരിച്ച ചെലവ് കാരണമാണ് ട്രെയിന്‍ ഡീകമ്മീഷന്‍ ചെയ്യാനുള്ള തീരുമാനത്തിന് കാരണമെന്ന് റിപ്പോര്‍ട്ട് പറയുന്നു. പകരം രണ്ട് ഹെലികോപ്റ്ററുകളാണ് ബദല്‍ മാര്‍ഗമായി ഉപയോഗിക്കുക. രാജകുടുംബം വര്‍ഷത്തില്‍ 140-ലധികം ഹെലികോപ്റ്റര്‍ യാത്രകള്‍ നടത്തുന്നു. ഒരു യാത്രക്ക് ശരാശരി 4600 ഡോളറാണ് ചെലവ്. ഈ വര്‍ഷം ബ്രിട്ടീഷ് സര്‍ക്കാറില്‍ നിന്ന് രാജകുടുംബത്തിന് ലഭിച്ച വാര്‍ഷിക മൊത്തം തുക 86.3 മില്യണ്‍ പൗണ്ട് (118.50 മില്യണ്‍ ഡോളര്‍) ആയിരുന്നു.

സോവറിന്‍ ഗ്രാന്റ് എന്ന് വിളിക്കപ്പെടുന്ന ഈ തുക, രാജകൊട്ടാരങ്ങളുടെയും രാജകുടുംബങ്ങളുടെയും ഔദ്യോഗിക കര്‍ത്തവ്യങ്ങളുടെയും പരിപാലനത്തിനായി ചെലവഴിക്കുന്നു. ബ്രിട്ടീഷ് നികുതിദായകരുടെ പണമാണ് രാജകുടുംബത്തിന് നല്‍കുന്നത്. ഗ്രാന്റിന് പകരമായി, 1760 മുതല്‍ ആരംഭിച്ച ഒരു കരാറില്‍, ക്രൗണ്‍ എസ്റ്റേറ്റില്‍ നിന്നുള്ള എല്ലാ ലാഭവും രാജാവ് സര്‍ക്കാരിന് കൈമാറുന്നു. ഇതില്‍ മധ്യ ലണ്ടന്‍ സ്വത്തിന്റെ വിശാലമായ ഭാഗങ്ങള്‍, അസ്‌കോട്ട് റേസ്‌കോഴ്സ്, ഇംഗ്ലണ്ട്, വെയില്‍സ്, വടക്കന്‍ അയര്‍ലന്‍ഡ് എന്നിവയ്ക്ക് ചുറ്റുമുള്ള കടല്‍ത്തീരങ്ങള്‍ എന്നിവ ഉള്‍പ്പെടുന്നു.

രാജാവിനും അവരുടെ പ്രതിനിധികള്‍ക്കും വേണ്ടിയുള്ള ചെലവ് നികത്താനാണ് സോവറിന്‍ ഗ്രാന്റ് ഉപയോഗിക്കുന്നത്. യാത്ര, ജീവനക്കാര്‍, ചരിത്രപരമായ സ്വത്തുക്കളുടെ പരിപാലനം എന്നിവയുള്‍പ്പെടെയുള്ള ചെലവുകള്‍ വഹിക്കുന്നു.