വിദേശ തൊഴിലാളികളെ റിക്രൂട്ട് ചെയ്യുന്നതില് മാറ്റങ്ങള് വരുത്തി യുകെ സര്ക്കാര് . പുതിയ വിസ നിയമങ്ങള് ജൂലൈ 22 മുതല് നിലവില് വരും. 22 മുതല് വിദേശത്ത് നിന്ന് സോഷ്യല് കെയര് റോളുകളിലേക്കുള്ള പുതിയ അപേക്ഷകള് സ്വീകരിക്കില്ല. എന്നിരുന്നാലും, നിലവില് യുകെയിലുള്ള കെയര് തൊഴിലാളികള്ക്ക് 2028 ജൂലൈ വരെ രാജ്യത്തിനുള്ളില് വിസ മാറാന് അനുവാദമുണ്ട്. കെയര് അസിസ്റ്റന്റുമാര്, സപ്പോര്ട്ട് വര്ക്കര്മാര്, നഴ്സുമാര്, കെയര് മാനേജര്മാര് തുടങ്ങിയ തസ്തികകളും കോംപ്ലക്സ് കെയറര്മാര്, ലൈവ്-ഇന് കെയറര്മാര് തുടങ്ങിയ പ്രത്യേക തസ്തികകളും ഇതില് ഉള്പ്പെടുന്നു.
സ്കില്ഡ് വര്ക്കര് വിഭാഗത്തില് അപേക്ഷിക്കുന്ന വിദേശ തൊഴിലാളികളുടെ ശമ്പള, നൈപുണ്യ പരിധികളിലും മാറ്റമുണ്ടാകും. പുതിയ നിയമങ്ങള് പ്രകാരം, മിക്ക ജോലികള്ക്കും കുറഞ്ഞത് ബാച്ചിലേഴ്സ് ഡിഗ്രി അല്ലെങ്കില് തത്തുല്യമായ യോഗ്യത ആവശ്യമാണ്.
മുമ്പ് ലളിതമായ വിസ നിബന്ധനകള് നല്കിയിരുന്ന ഷോര്ട്ടേജ് ഒക്യുപേഷന് ലിസ്റ്റില് നിന്ന് 100-ല് അധികം തസ്തികകള് നീക്കം ചെയ്യും. ഷെഫുകള്, പ്ലാസ്റ്ററര്മാര് തുടങ്ങിയ ജോലികള് ഇതില് ഉള്പ്പെടുന്നു. ഇനി മുതല്, 'അത്യാവശ്യം' എന്ന് കരുതുന്ന കുറച്ച് തസ്തികകള്ക്ക് മാത്രമേ ബിരുദ നിലവാരത്തിന് താഴെയായി താല്ക്കാലിക പ്രവേശനം ലഭിക്കൂ.
താല്ക്കാലിക ഷോര്ട്ടേജ് ലിസ്റ്റ് അവലോകനം ചെയ്യും - 2026-ന് ശേഷവും ഈ തസ്തികകള് ലിസ്റ്റില് നിലനിര്ത്തണോ എന്നതുള്പ്പെടെ പരിശോധിക്കും. ഈ ജോലികളിലുള്ള തൊഴിലാളികള്ക്ക് ഇനി ഫീസ് അല്ലെങ്കില് ശമ്പള കിഴിവുകള് ലഭിക്കില്ല, കൂടാതെ ആശ്രിതരെ കൊണ്ടുവരാനും കഴിയില്ല.
യുകെയിലുള്ള സ്കില്ഡ് വിഭാഗത്തിലുള്ള തൊഴിലാളികളെ പുതിയ നിയമങ്ങള് ബാധിക്കില്ല.നിലവില് യുകെയില് സ്കില്ഡ് വര്ക്കര് വിസയിലുള്ളവര്ക്ക് പുതിയ ബിരുദതല യോഗ്യതാ മാനദണ്ഡം ബാധകമല്ല.
