ജാനകി ഇനി ജാനകി വി; സുരേഷ് ഗോപി ചിത്രത്തിന്റെ പേര് മാറ്റാമെന്ന് നിര്മാതാക്കള് കോടതിയില്
സുരേഷ് ഗോപി ചിത്രം 'ജാനകി വേഴ്സസ് സ്റ്റേറ്റ് ഓഫ് കേരള' എന്ന ചിത്രത്തിന്റെ പേര് മാറ്റാന് തയ്യാറാണെന്ന് നിര്മാതാക്കള്. പേരിനൊപ്പം ഇനീഷ്യല് കൂടി ചേര്ത്ത് പേര് ജാനകി വി. എന്നാക്കി മാറ്റാമെന്ന് നിര്മാതാക്കള് ഹൈക്കോടതിയെ അറിയിച്ചു. നേരത്തേ കഥാപാത്രത്തിന്റെ പേരിനൊപ്പം ഇനീഷ്യല്ചേര്ക്കണമെന്നും ചിത്രത്തിന്റെ അവസാന ഭാഗത്തെ ക്രോസ് വിസ്താരത്തിനിടെ ജാനകി എന്ന് ഉപയോഗിക്കുന്നത് ഒഴിവാക്കണമെന്നും സെന്സര് ബോര്ഡിന്റെ അഭിഭാഷകന് കോടതിയില് പറഞ്ഞു.
നേരത്തെ ചിത്രത്തില് 96 കട്ടുകള് വേണമെന്നായിരുന്നു സെന്സര് ബോര്ഡ് പറഞ്ഞിരുന്നത്. ഈ നിലപാട് മാറ്റിയിരിക്കുകയാണ് സെന്സര് ബോര്ഡ്. 'ജാനകി വേഴ്സസ് .സ്റ്റേറ്റ് ഓഫ് കേരള' എന്ന സിനിമയുടെ പേരില് കഥാപാത്രത്തിന്റെ ഇനീഷ്യലും ചേര്ത്ത് വി. ജാനകി അല്ലെങ്കില് ജാനകി വി. എന്ന് നല്കണമെന്നാണ് സെന്സര് ബോര്ഡ് പറഞ്ഞത്.
സിനിമയുടെ അവസാനരംഗത്ത് ക്രോസ് വിസ്താരം ചെയ്യുന്ന സീനില് പലതവണ കഥാപാത്രത്തിന്റെ പേര് പറയുന്നുണ്ട്. അത് പൂര്ണമായും ഒഴിവാക്കണമെന്നും സെന്സര് ബോര്ഡ് നിര്ദ്ദേശിച്ചിരുന്നു.
