കൊച്ചി: കേരളത്തെ ഞെട്ടിച്ച ഗ്രീഷ്മക്കേസിന്റെ തനിയാവര്ത്തനം കോതമംഗലത്ത്. മാതിരപ്പള്ളി മേലേത്തുമാലില് അലിയാരുടെ മകന് അന്സില് (38) വിഷം ഉള്ളില്ച്ചെന്ന് മരിച്ച സംഭവം ആസൂത്രിത കൊലപാതകമെന്ന് സ്ഥിരീകരിച്ച് പൊലീസ്. പെണ്സുഹൃത്ത് ചേലാട് സ്വദേശി അദീന വിഷംകൊടുത്ത് അന്സിലിനെ കീടനാശിനി കൊല്ലുകയായിരുന്നു എന്നാണ് പൊലീസ് വ്യക്തമാക്കുന്നത്. അദീന പാരക്വിറ്റ് എന്ന കീടനാശിനിയാണ് അന്സിലിന് നല്കിയതെന്നാണ് പൊലീസ് പറയുന്നത്. എന്നാല് ഇത് എന്തില് കലക്കിയാണ് നല്കിയതെന്ന് വ്യക്തമല്ല. ചേലാടുള്ള കടയില് നിന്നാണ് കീടനാശിനി വാങ്ങിയതെന്നും വ്യക്തമായിട്ടുണ്ട്.
തിരുവനന്തപുരത്ത് കാമുകന് ഷാരോണിനെ കൊലപ്പെടുത്താന് ഗ്രീഷ്മ കക്ഷായത്തില് കലക്കിക്കൊടുത്തതും പാരക്വിറ്റ് എന്ന കീടനാശിനിയാണ്. കേസില് ശിക്ഷിക്കപ്പെട്ട ഗ്രീഷ്മ ഇപ്പോള് ജയിലിലാണ്.
അന്സിലിനെ ഒഴിവാക്കാനാണ് അദീന കീടനാശിനി നല്കിയതെന്നാണ് പൊലീസ് പറയുന്നത്. ഒറ്റപ്പെട്ട സ്ഥലത്തെ വീട്ടില് ഒറ്റയ്ക്കാണ് അദീന താമസിക്കുന്നത്. ഇവിടേയ്ക്ക് അന്സില് പതിവായി എത്താറുണ്ടായിരുന്നു. ഇക്കഴിഞ്ഞ മുപ്പതിന് വീട്ടിലേക്ക് വിളിച്ചുവരുത്തിയശേഷം വിഷം നല്കുകയായിരുന്നു. അന്സില് ഒരിക്കല് വീട്ടിലെത്തി അദീനയ്ക്കുനേരെ തോക്കുചൂണ്ടി ഭീഷണിപ്പെടുത്തിയിരുന്നു എന്നും സ്ഥിരീകരിക്കാത്ത റിപ്പോര്ട്ടുണ്ട്. അദീനയുടെ വീട്ടില് നടത്തിയ പരിശോധനയില് കീടനാശിനി ലഭിച്ചിട്ടുണ്ട്.
അവശനിലയില് രാജഗിരി ആശുപത്രിയില് ചികിത്സയിലിരിക്കെ വ്യാഴാഴ്ച വൈകിട്ടോടെയായിരുന്നു അന്സില് മരിച്ചത്. സുഹൃത്തായ അദീന വിഷം കലക്കിത്തന്നതായി ചികിത്സയിലിരിക്കെ അന്സില് മൊഴി നല്കിയിരുന്നുവെന്നാണ് അറിയുന്നത്. അദീന വിഷം വാങ്ങിയതിന്റെ തെളിവുകള് പൊലീസിന് ലഭിച്ചിരുന്നു. തുടര്ന്ന് കസ്റ്റഡിയിലെടുത്ത് വിശദമായി ചോദ്യംചെയ്തതോടെ കുറ്റം സമ്മതിക്കുകയായിരുന്നു.
അന്സില് വിഷം കഴിച്ച് തന്റെ വീട്ടില് കിടപ്പുണ്ടെന്ന് അദീന തന്നെയാണ് അന്സിലിന്റെ വീട്ടില് വിളിച്ചുപറഞ്ഞത്. തുടര്ന്ന് സ്ഥലത്തെത്തിയ പൊലീസ് അന്സിലിനെ ആശുപത്രിയിലേക്ക് കൊണ്ടുപോകുകയായിരുന്നു. യാത്രാമദ്ധ്യേ ഒരു ബന്ധുവും ആംബുലന്സില് കയറി. തന്നെ ചതിച്ചെന്നും വിഷം നല്കിയെന്നും അന്സില് ഈ ബന്ധുവിനോടാണ് പറഞ്ഞത്. ഇതാണ് കേസില് നിര്ണായകമായത്. നിന്റെ മകനെ വിഷംകൊടുത്ത് കൊല്ലുമെന്ന് അദീന അന്സിലിന്റെ ഉമ്മയോട് പറഞ്ഞതായും അയാള് പറയുന്നു.
അന്സില് വിവാഹിതനാണ്. മക്കളുമുണ്ട്. അന്സിലിന്റെ ബന്ധു കൂടിയാണ് അദീന.
