ഇംഗ്ലണ്ടില്‍ താപനില വര്‍ധിക്കുന്നതിന് പിന്നാലെ ഏഴ് പ്രദേശങ്ങള്‍ക്ക് ഓഗസ്റ്റ് 18 വൈകിട്ട് 6 മണി വരെ ഹീറ്റ് വാണിംഗ് പ്രഖ്യാപിച്ചു. യോര്‍ക്ക്ഷയര്‍, ഹംബര്‍, കിഴക്ക്, പടിഞ്ഞാറന്‍ മിഡ്‌ലാന്‍ഡ്‌സ്, ലണ്ടന്‍, തെക്ക് കിഴക്ക്, തെക്ക് പടിഞ്ഞാറ്, ഇംഗ്ലണ്ടിന്റെ കിഴക്ക് എന്നീ പ്രദേശങ്ങളിലാണ് മുന്നറിയിപ്പ് നല്‍കിയിരിക്കുന്നത്. ഈ താപനില പ്രധാനമായും പ്രായമായവരെയും നിലവില്‍ ആരോഗ്യപ്രശ്നങ്ങളുള്ളവരെയും ആണ് ബാധിക്കുക.
അതേസമയം, സ്കോട്ട് ലന്‍ഡിന്റെ മിക്ക ഭാഗങ്ങളിലും ബുധനാഴ്ച അര്‍ദ്ധരാത്രി വരെ ഇടിമിന്നലിന്റെ യെല്ലോ വാണിംഗ് നിലവിലുണ്ട്. സെന്‍ട്രല്‍, സൗത്ത് ഈസ്റ്റ് സ്കോട്ട് ലന്‍ഡില്‍ കനത്ത മഴ പ്രാദേശിക തടസ്സങ്ങള്‍ക്കും പെട്ടെന്നുള്ള വെള്ളപ്പൊക്കത്തിനും സാധ്യതയുണ്ടാക്കുമെന്ന് കാലാവസ്ഥാ നിരീക്ഷണ കേന്ദ്രം മുന്നറിയിപ്പ് നല്‍കിയിട്ടുണ്ട്.
ചൊവ്വാഴ്ച ഇംഗ്ലണ്ടിന്റെ നോര്‍ത്തോള്‍ട്ട്, റോസ്-ഓണ്‍-വൈ, ബെന്‍സണ്‍ എന്നിവിടങ്ങളില്‍ താപനില 33.4°C വരെ രേഖപ്പെടുത്തിയിരുന്നു. വെയില്‍സിലെ കാര്‍ഡിഫില്‍ 32.8°C യും, സ്കോട്ട് ലന്‍ഡിലെ ചാര്‍ട്ടര്‍ഹാളില്‍ 29.4°C യും, വടക്കന്‍ അയര്‍ലന്‍ഡിലെ അര്‍മാഗില്‍ 27.8°C യും താപനില രേഖപ്പെടുത്തി. കാലാവസ്ഥാ വ്യതിയാനം കാരണം ഉഷ്ണ തരംഗങ്ങള്‍ കൂടുതല്‍ പതിവായി മാറുകയും തീവ്രമാവുകയും ചെയ്തിരിക്കുകയാണ്.
