മുഖ്യ തെരഞ്ഞെടുപ്പ് കമ്മീഷണര്ക്കെതിരെ ഇംപീച്ച്മെന്റ് നോട്ടീസിന് ഇന്ത്യസഖ്യത്തിന്റെ നീക്കം. ഇന്ന് ചേര്ന്ന യോഗത്തിലാണ് ഇംപീച്ച്മെന്റ് ചെയ്യാനുള്ള ചര്ച്ച. തിരഞ്ഞെടുപ്പ് കമ്മിഷനെ ഇംപീച്ച് ചെയ്യാനുള്ള സാധ്യതകളാണ് ഇന്ത്യാ മുന്നണി പരിശോധിക്കുന്നത്. ഇന്ന് രാവിലെ മല്ലികാര്ജുന് ഖാര്ഗെയുടെ പാര്ലമെന്റ് ഓഫീസില് ചേര്ന്ന ഇന്ത്യ മുന്നണി യോഗത്തിലാണ് മുഖ്യ തിരഞ്ഞെടുപ്പ് കമ്മിഷണറെ ഇംപീച്ച് ചെയ്യാനുള്ള ചര്ച്ചകള് നടന്നത്. പ്രാഥമിക ഘട്ട ചര്ച്ചകളാണ് നടന്നത്.
വോട്ട് ചോരി ആരോപണത്തില് തിരഞ്ഞെടുപ്പ് കമ്മിഷനെ കൂടുതല് പ്രതിരോധത്തിലാക്കാനാണ് പ്രതിപക്ഷ നീക്കം. നിയമപരായും ഭരണഘടനപരമായ സാധ്യതകള് ഉള്പ്പെടെയുള്ള കാര്യങ്ങള് ഇന്ത്യാ സഖ്യം പരിശോധിച്ചുവരികയാണ്.
ഭരണഘടനയെ സംരക്ഷിക്കാനുള്ള യുദ്ധമാണിതെന്ന് രാഹുല് ഗാന്ധി പറഞ്ഞു. വോട്ട് മോഷണ ആരോപണം അദ്ദേഹം ആവര്ത്തിച്ചു. ഒരു കോടി പുതിയ വോട്ടര്മാരെ മഹാരാഷ്ട്രയില് ചേര്ത്തു. ഉന്നയിച്ച സംശയങ്ങള്ക്ക് മറുപടി നല്കുന്നില്ല. കള്ള വോട്ടുകള്കൊണ്ടാണ് ബി ജെ പി ജയിക്കുന്നത്.
സിസിടിവി ദൃശ്യങ്ങള്ങ്ങളോ,മറ്റ് ഡിജിറ്റല് തെളിവുകളോ കമ്മീഷന് നല്കുന്നില്ല ബിഹാര് ജനത വോട്ട് മോഷണം അനുവദിക്കില്ല. ബിഹാറില് മാത്രമല്ല അസമിലും, മഹാരാഷ്ട്രയിലും,ബംഗാളിലുമൊക്കെ വോട്ട് മോഷണം നടന്നുവെന്നും അദ്ദേഹം കൂട്ടിച്ചേര്ത്തു.
