രാജ്യത്തിന്റെ സമ്പദ് വ്യവസ്ഥയില് വളര്ച്ച സമ്മാനിക്കാനെന്ന പേരില് ചാന്സലര് റേച്ചല് റീവ്സ് അവതരിപ്പിച്ച ആദ്യ ബജറ്റ് പ്രഖ്യാപനങ്ങള് ഏല്പ്പിച്ച ആഘാതം വളരെ വലുതായിരുന്നു. നികുതി ഭാരം ഏതുവഴിയ്ക്കും വരാമെന്ന ഭീതിയിലാണ് ജനം. ഇതിനിടയിലാണ് പുതിയ പ്രോപ്പര്ട്ടി ടാക്സുമായി റീവ്സ് രംഗപ്രവേശം ചെയ്യുമെന്ന അഭ്യൂഹങ്ങള് ശക്തമാകുന്നത്.
500,000 പൗണ്ടിന് മുകളില് മൂല്യമുള്ള വീടുകളുടെ വില്പ്പനയില് നികുതി ഏര്പ്പെടുത്താന് റേച്ചല് റീവ്സ് ആലോചിക്കുന്നതായാണ് കരുതുന്നത്. കൂടാതെ 1.5 മില്ല്യണ് പൗണ്ടിന് മുകളിലുള്ള പ്രൈമറി ഭവനങ്ങള്ക്ക് നല്കിയിരുന്ന ക്യാപിറ്റല് ഗെയിന്സ് ടാക്സ് ഇളവ് ഒഴിവാക്കി ഗവണ്മെന്റിന് കൂടുതല് വരുമാനം നല്കാനും ചാന്സലര് ആലോചന നടത്തുന്നുണ്ട്. ബജറ്റില് ഈ പ്രഖ്യാപനം ഉണ്ടാകുമെന്ന വാര്ത്തകള് വന്നതോടെ ഹൗസിംഗ് വിപണി ഇപ്പോള് മെല്ലെപ്പോക്കിലേക്ക് മാറിയെന്ന് എസ്റ്റേറ്റ് ഏജന്റുമാര് ചൂണ്ടിക്കാണിക്കുന്നു.
500,000 പൗണ്ടിന് മുകളിലെ വീടുകളുടെ വില്പ്പനയില് നികുതി ഏര്പ്പെടുത്തുമെന്ന് വന്നതോടെ വീട് വാങ്ങാന് ആഗ്രഹിക്കുന്നവര് പലരും കാത്തിരുന്ന് കാണാമെന്ന നിലപാടിലേക്ക് മാറിയെന്ന് പ്രോപ്പര്ട്ടി വെബ്സൈറ്റ് സൂപ്ല പറയുന്നു.
