ഹൃദയാഘാതവും സ്‌ട്രോക്കും തടയുന്നതില്‍ പതിറ്റാണ്ടുകളായി പ്രാഥമികമായി ഉപയോഗിച്ചിരുന്ന ആസ്പിരിനിനേക്കാള്‍ ക്ലോപിഡോഗ്രെല്‍ എന്ന മരുന്ന് കൂടുതല്‍ ഫലപ്രദമാണെന്ന് പുതിയ പഠനം. യൂറോപ്പിലെ ഏറ്റവും വലിയ ഹാര്‍ട്ട് കോണ്‍ഫറന്‍സ് ആയ യൂറോപ്യന്‍ സൊസൈറ്റി ഓഫ് കാര്‍ഡിയോളജി കോണ്‍ഗ്രസില്‍ അവതരിപ്പിച്ച പഠനം, പ്രശസ്തമായ ലാന്‍സെറ്റ് മെഡിക്കല്‍ ജേര്‍ണലിലും പ്രസിദ്ധീകരിച്ചിട്ടുണ്ട്.
ലോകത്ത് ഏകദേശം 300 മില്യണ്‍ ആളുകള്‍ ആണ് ഹൃദയ സംമ്പന്ധമായ രോഗത്തോട് (CAD) ജീവിക്കുന്നത്. അതില്‍ യുകെയില്‍ മാത്രം 23 ലക്ഷത്തിലധികം രോഗികളുണ്ട്. ബ്രിട്ടനില്‍ ഹൃദയാഘാതം വര്‍ഷം തോറും ആയിരക്കണക്കിന് പേരുടെ മരണത്തിനിടയാക്കുമ്പോള്‍ ഈ കണ്ടെത്തല്‍ ഭാവിയില്‍ ചികിത്സാ മാര്‍ഗ്ഗങ്ങള്‍ തന്നെ മാറ്റിമറിക്കുമെന്നു വിദഗ്ധര്‍ പറയുന്നു.
ആഗോള തലത്തില്‍ 29,000 രോഗികളെ ഉള്‍പ്പെടുത്തി നടത്തിയ ഏഴ് പ്രധാന ക്ലിനിക്കല്‍ പരീക്ഷണങ്ങളാണ് പഠനത്തിന്റെ അടിസ്ഥാനം. ക്ലോപിഡോഗ്രെല്‍ ഉപയോഗിച്ചവര്‍ക്ക് ഹൃദയാഘാതം, സ്‌ട്രോക്ക്, ഹൃദയസംബന്ധമായ മരണം തുടങ്ങിയവയുടെ അപകടസാധ്യത 14 ശതമാനം വരെ കുറവ് ഉണ്ടാകുന്നു എന്നാണ് കണ്ടെത്തിയത്.
യുകെയില്‍ മാത്രം പ്രതിവര്‍ഷം ഏകദേശം 64,000 പേര്‍ ഹൃദയാഘാതം മൂലം മരിക്കുന്നുണ്ട് . രോഗികള്‍ക്ക് ലഭ്യമായ മരുന്നുകളില്‍ കൂടുതല്‍ സുരക്ഷയും ഫലപ്രാപ്തിയും ഉറപ്പാക്കുന്ന കണ്ടെത്തലാണ് ഇത് എന്നാണ് വിദഗ്ദ്ധര്‍ അഭിപ്രായപ്പെടുന്നത്. ക്ലോപിഡോഗ്രെല്‍ ഉപയോഗിക്കുന്നവര്‍ക്ക് ആസ്പിരിന്‍ ഉപയോഗിക്കുന്നവരേക്കാള്‍ കൂടുതല്‍ ഫലപ്രാപ്തി ഉണ്ടെന്നാണ് പഠനം വ്യക്തമാക്കുന്നത്. ഇത് ഈ മരുന്നിന്റെ വ്യാപക ഉപയാഗത്തിന് വഴിതെളിയിക്കുമെന്നാണ് വിലയിരുത്തുന്നത്.
'ആസ്പിരിന്‍ പതിവായി ഹൃദയാഘാതവും സ്‌ട്രോക്കും തടയാന്‍ നല്‍കിയിരുന്നുവെങ്കിലും, ഇപ്പോള്‍ ക്ലോപിഡോഗ്രെല്‍ കൂടുതല്‍ ഫലപ്രദമാണെന്ന് തെളിവുകള്‍ വ്യക്തമാക്കുന്നു എന്ന് ബ്രിട്ടീഷ് ഹാര്‍ട്ട് ഫൗണ്ടേഷന്റെ ചീഫ് സയന്റിഫിക് ആന്‍ഡ് മെഡിക്കല്‍ ഓഫീസര്‍ പ്രൊഫ. ബ്രയാന്‍ വില്യംസ് പറഞ്ഞു. ഈ മരുന്ന് ഉപയോഗിക്കുന്നവരില്‍ അധിക രക്തസ്രാവം ഉണ്ടാകുന്നില്ലെന്നതും ഗുണകരമാണെന്നാണ് ആതുര ചികിത്സാ മേഖലയിലുള്ളവര്‍ അഭിപ്രായപ്പെട്ടു. യുകെയില്‍ ഹൃദയരോഗം മൂലം വര്‍ഷംതോറും ഏകദേശം 1,70,000 പേര്‍ മരിക്കുന്നു. ഇതില്‍ വലിയൊരു വിഭാഗം ഹൃദയ സമ്പന്ധമായ രോഗമുള്ളവരാണ് . അതിനാല്‍, ഈ പുതിയ കണ്ടെത്തല്‍ മരുന്ന് നല്‍കുന്നതിലും ചികിത്സാ മാനദണ്ഡങ്ങളിലും വലിയ മാറ്റങ്ങള്‍ വരുത്താനിടയുണ്ട്' അദ്ദേഹം വ്യക്തമാക്കി.
