കമല് ഹാസന്റെ എല്ലാ ചിത്രങ്ങളിലും ചുംബന രംഗങ്ങള്; ഞാന് കാണാറില്ല- മോഹിനി
മലയാളത്തിലും തമിഴിലും തെലുങ്കിലുമെല്ലാം മുന്നിര നായകരുടെ ജോഡിയായി അഭിനയിച്ചിട്ടുള്ള നായികയാണ് മോഹിനി. വിജയ്ക്കും രജനികാന്തിനുമൊപ്പം സിനിമകള് വന്നിരുന്നെങ്കിലും ചെയ്യാന് കഴിഞ്ഞില്ലെന്നും അതൊരു വലിയ നഷ്ടമാണെന്നും മോഹിനി പറഞ്ഞു. എന്നാല് കമല് ഹാസന് സിനിമകള് തനിക്ക് ഇഷ്ടമല്ലെന്നും വാരണം ആയിരം സിനിമയിലെ വേഷം നഷ്ടമായെന്നും മോഹിനി പറഞ്ഞു. 'അവള് വികടന്' നല്കിയ അഭിമുഖത്തിലാണ് പ്രതികരണം.
'രജനി സാറിന്റെ കൂടെ അഭിനയിക്കാന് കഴിഞ്ഞില്ല എന്നത് ഒരു കുറവാണ്. അതുപോലെ വിജയ്യുടെ കൂടെയും. 'കോയമ്പത്തൂര് മാപ്പിളൈ' എന്ന സിനിമയില് അഭിനയിക്കാന് വിളിച്ചിരുന്നു, പക്ഷെ ആ സിനിമയില് ഷോര്ട്ട്സ് ധരിക്കേണ്ടിയിരുന്ന ഒരു രംഗം ഉണ്ടായിരുന്നു. ഞാന് അത്തരം വസ്ത്രം ധരിക്കാത്തതുകൊണ്ട് ആ വേഷം നിരസിച്ചു. അതുപോലെ വാരണം ആയിരം സിനിമയിലെ സിമ്രാന് വേഷം വന്നിരുന്നു. പക്ഷെ അതും ചെയ്യാന് പറ്റിയില്ല.
ഞാന് അഭിനയിക്കുന്നില്ലെന്ന് അപ്പോഴേക്കും ആരൊക്കെയോ പറഞ്ഞു പരത്തിയിരുന്നു. ഇത് വാരണം ആയിരം സിനിമയുടെ സംവിധായകന് തന്നെ എന്നോട് പറഞ്ഞിരുന്നു. നിങ്ങളെ കാസറ്റ് ചെയ്യണം എന്ന ആഗ്രഹം ഉണ്ടായിരുന്നുവെന്ന്. പക്ഷെ കോണ്ടാക്ട് ചെയ്യാന് ശ്രമിച്ചപ്പോഴേക്കും നിങ്ങള് അഭിനയിക്കുന്നില്ലെന്ന് പലരും പറഞ്ഞുവെന്ന്,' മോഹിനി പറഞ്ഞു.
കമല്ഹാസന് സിനിമകള് കാണാന് തനിക്ക് ഇഷ്ടമല്ലെന്നും മോഹിനി പറഞ്ഞു. അദ്ദേഹത്തിന്റെ എല്ലാ സിനിമകളിലും നായികമാരെ ചുംബിക്കുന്ന രംഗങ്ങള് ഉണ്ടെന്നും അതുകൊണ്ടാണ് തനിക്ക് കമല്ഹാസന് ചിത്രങ്ങളേക്കാള് കൂടുതല് രജനികാന്തിന്റെ സിനിമകള് കാണാന് താല്പര്യം എന്നും മോഹിനി പറഞ്ഞു. ദളപതി സിനിമയിലും തന്നെ ശോഭനയുടെ റോളിലേക്ക് കാസ്റ്റ് ചെയ്തിരുന്നുവെന്നും എന്നാല് ചെയ്യാന് കഴിഞ്ഞില്ലെന്നും മോഹിനി കൂട്ടിച്ചേര്ത്തു.
