യാത്രയ്ക്കിടെ എയര് ഇന്ത്യ വിമാനത്തിന്റെ കോക്പിറ്റിലേക്ക് കയറാന് ശ്രമിച്ച് യാത്രക്കാരന്. വിമാനം 35000 അടി ഉയരത്തില് പറന്നുകൊണ്ടിരിക്കയാണ് അപ്രതീക്ഷിത സുരക്ഷാ പ്രതിസന്ധി ഉണ്ടായത്. പൈലറ്റിന്റെ സമചിത്തതയില് അപകടം ഒഴിവായി. ബെംഗളൂരുവില് നിന്ന് വാരണസിയിലേക്കുള്ള എയര് ഇന്ത്യ വിമാനത്തില് തിങ്കളാഴ്ചയാണ് സംഭവം.
കോക്പിറ്റ് മേഖലയില് കയറിയ യാത്രക്കാരന് കോക്പിറ്റിലേക്ക് കൃത്യമായ പാസ്കോഡ് അടിച്ചാണ് കയറാന് ശ്രമിച്ചത്. ഇതോടെ വിമാനം തട്ടിക്കൊണ്ട് പോകാനുള്ള ശ്രമമാണെന്ന് ഭയന്ന പൈലറ്റ് കോക്പിറ്റ് തുറക്കാതിരിക്കുകയായിരുന്നു. എട്ട് പേരാണ് ഈ യാത്രക്കാരനൊപ്പമുണ്ടായിരുന്നത്.
ഐഎക്സ് 1086 എന്ന എയര് ഇന്ത്യ വിമാനത്തിലാണ് സംഭവമുണ്ടായത്. ലാന്ഡ് ചെയ്തതിന് പിന്നാലെ ഒന്പത് യാത്രക്കാരെയും സിഐഎസ്എഫിന് കൈമാറി. രാവിലെ എട്ടേകാലോടെ ടേക്ക് ഓഫ് ചെയ്ത വിമാനം 10.21നാണ് വാരണാസിയില് ലാന്ഡ് ചെയ്തത്.
