ദാദാസാഹിബ് ഫാല്ക്കെ പുരസ്കാരം ഏറ്റുവാങ്ങി മോഹന്ലാല്
ന്യൂഡല്ഹി: രാഷ്ട്രപതിയില് നിന്നും ദാദാസാഹിബ് ഫാല്ക്കെ പുരസ്കാരം ഏറ്റുവാങ്ങി മോഹന്ലാല്. എഴുപത്തിയൊന്നാമത് ദേശീയ ചലച്ചിത്ര പുരസ്കാര വേദിയില് വെച്ചാണ് നടന് ഈ പരമോന്നത ബഹുമതി ഏറ്റുവാങ്ങിയത്. സദസ്സ് എഴുന്നേറ്റുനിന്ന്, നിറഞ്ഞ കയ്യടികളോടെയാണ് ഈ മുഹൂര്ത്തത്തിന് സാക്ഷികളായത്. ചലച്ചിത്ര മേഖലയിലെ സമഗ്ര സംഭാവനയ്ക്കുള്ള പുരസ്കാരമാണ് മോഹന്ലാലിന് ലഭിച്ചത്. ആദ്യമായാണ് ഒരു മലയാള നടന് ഫാല്ക്കെ പുരസ്കാരം ലഭിക്കുന്നത്.
'അഭിമാനകരമായ നിമിഷത്തിലാണ് നില്ക്കുന്നത്. മൊത്തം മലയാള സിനിമയ്ക്കുള്ള അംഗീകാരം…ഇത്തരമൊരു നിമിഷത്തെക്കുറിച്ച് താന് ഒരിക്കലും സ്വപ്നം കണ്ടിരുന്നില്ല. എന്റെ പുരസ്കാരം മലയാള സിനിമയ്ക്ക് സമര്പ്പിക്കുന്നു. എന്റെ ആത്മാവിന്റെ സ്പന്ദനമാണ് സിനിമ', മോഹന്ലാല് പറഞ്ഞു. അതോടൊപ്പം കുമാരനാശാന്റെ കവിത വേദിയില് ചൊല്ലുകയും ചെയ്തു മോഹന്ലാല്. മലയാള സിനിമയുടെ പാരമ്പര്യത്തിനും സര്ഗാത്മകതയ്ക്കും ലഭിച്ച ആദരവായിട്ടാണ് പുരസ്കാരത്തെക്കാണുന്നതെന്നും അദ്ദേഹം പറഞ്ഞു.
കൂടാതെ, മോഹന്ലാലിനെ അഭിനന്ദിച്ച് രാഷ്ട്രപതി സംസാരിക്കുകയും ചെയ്തു. വേദിയില് മോഹന്ലാലിന്റെ നാടകമായ കര്ണഭാരത്തെകുറിച്ച് പരാമര്ശിച്ച് രാഷ്ട്രപതി. മോഹന്ലാലിന് പുരസ്കാരം ലഭിച്ചതില് ജനങ്ങള് വലിയ സന്തോഷത്തിലാണെന്നും പറഞ്ഞു. വിവിധ ഭാവങ്ങള് തന്മയത്വത്തോടുകൂടി അവതരിപ്പിക്കാന് കഴിയുന്നതുകൊണ്ടാണ് അദ്ദേഹത്തെ കംപ്ലീറ്റ് ആക്ടര് എന്ന് പറയുന്നതെന്നും രാഷ്ട്രപതി പറഞ്ഞു.
