നഴ്‌സുമാരുടെ ക്ഷാമം രൂക്ഷം; യോഗ്യത നേടുന്ന പുതിയ നഴ്‌സുമാര്‍ ഹോസ്പിറ്റാലിറ്റി മേഖലയിലേക്ക്!
രോഗികളുടെ ബാഹുല്യം മൂലം എന്‍എച്ച്എസ് വീര്‍പ്പു മുട്ടുകയാണ്. സേവനങ്ങള്‍ വേഗത്തില്‍ ലഭ്യമാക്കാന്‍ എന്‍എച്ച്എസിന് നഴ്‌സുമാരുടെ സേവനവും അനിവാര്യമാണ്. എന്നാല്‍ രോഗികളുടെ ഡിമാന്‍ഡിന് അനുസൃതമായി നഴ്‌സുമാരുടെ എണ്ണം വര്‍ധിക്കുന്നുമില്ല. കുടിയേറ്റക്കാരായ നഴ്‌സുമാരാണ് ഒരുപരിധി വരെ സേവനങ്ങള്‍ പിടിച്ചുനിര്‍ത്തുന്നത്.
എന്നാല്‍ രാജ്യത്ത് ക്വാളിഫൈ ചെയ്യുന്ന നഴ്‌സുമാര്‍ മേഖല മാറി പോകുകയാണ് എന്ന് പറയപ്പെടുന്നു. പുതുതായി യോഗ്യത നേടുന്ന നഴ്‌സുമാരില്‍ നല്ലൊരു ഭാഗവും ഹോസ്പിറ്റലുകള്‍ക്ക് പകരം ഹോസ്പിറ്റാലിറ്റി മേഖലയിലാണ് ജോലി ചെയ്യുന്നത്. ലഭ്യമായ ജോലികളുടെ കടുത്ത ക്ഷമാമാണ് ഇതിലേക്ക് നയിക്കുന്നതെന്നാണ് പറയുന്നത്. അതേസമയം ദേശീയ തലത്തില്‍ നഴ്‌സുമാരുടെ ക്ഷാമം നേരിടുകയും ചെയ്യുന്നു.
രോഗികളുടെ ആവശ്യത്തിനൊപ്പം നില്‍ക്കുന്ന തോതില്‍ നഴ്‌സുമാരില്ലെന്ന് റോയല്‍ കോളേജ് ഓഫ് നഴ്‌സിംഗ് ഈ മാസം മുന്നറിയിപ്പ് നല്‍കിയിരുന്നു. 81 ശതമാനം നഴ്‌സുമാരാണ് ആവശ്യത്തിന് ജോലിക്കാരില്ലാതെയാണ് സേവനം നല്‍കുന്നതെന്ന് വ്യക്തമാക്കിയത്. 34,000 വേക്കന്‍സികള്‍ വിവിധ ഭാഗങ്ങളിലായി ഒഴിഞ്ഞ് കിടക്കുന്നുവെന്നാണ് കണക്ക്.
ആവശ്യത്തിന് ജീവനക്കാരില്ലാതെ ജോലി ചെയ്യുന്നത് ഒരു പതിവായി മാറിയിട്ടുണ്ടെന്ന് ഒരു നഴ്‌സ് വെളിപ്പെടുത്തി. എന്നാല്‍ ഈ അവസ്ഥയിലും പുതുതായി യോഗ്യത നേടുന്ന നഴ്‌സുമാര്‍ക്ക് ജോലി കണ്ടെത്താന്‍ ബുദ്ധിമുട്ടും നേരിടുന്നു. ഇതോടെയാണ് പലരും പബ്ബുകളിലും, ബാറുകളിലും ജോലി ചെയ്യുന്നത്. നാല് വ്യത്യസ്ത നഗരങ്ങളില്‍ നഴ്‌സിംഗ് ജോലിക്കായി അപേക്ഷിച്ച ശേഷം ലഭിക്കാതെ വന്നതോടെയാണ് പിടിച്ചുനില്‍ക്കാന്‍ ഹോസ്പിറ്റാലിറ്റി മേഖലയില്‍ ജോലി തുടങ്ങിയതെന്ന് പലരും പറയുന്നു.
