സുപ്രീംകോടതി ചീഫ് ജസ്റ്റിസിന് നേരെ കോടതി മുറിക്കുള്ളില് അതിക്രമ ശ്രമം. ബിആര് ഗവായ്ക്ക് നേരെ ഷൂ ഏറിയാനുള്ള ശ്രമമുണ്ടായി. രാവിലെ കേസ് പരാമര്ശിക്കുന്നതിനിടെയാണ് സംഭവം. സനാതന ധര്മ്മത്തിനെതിരായി ചീഫ് ജസ്റ്റിസ് പ്രവര്ത്തിക്കുന്നു എന്നാരോപിച്ച് ഒരു അഭിഭാഷകന് എത്തുകയും മുദ്രാവാക്യം വിളിച്ചുകൊണ്ട് ഷൂ എറിയാന് ശ്രമിച്ചു എന്നുമാണ് റിപ്പോര്ട്ട്.
പിന്നാലെ സുപ്രീംകോടതിയുടെ സുരക്ഷാ ജീവനക്കാര് ഇടപെടുകയും അഭിഭാഷകനെ പിടിച്ചുകൊണ്ടുപോവുകയും ചെയ്തു. 71 വയസുള്ള രാകേഷ് കിഷോര് എന്ന അഭിഭാഷകനാണ് അതിക്രമ ശ്രമം നടത്തിയത്. ഇയാളെ പൊലീസിന് കൈമാറി. അഭിഭാഷകനെ മൂന്ന് മണിക്കൂര് ചോദ്യം ചെയ്ത ശേഷം വിട്ടയച്ചു. അദ്ദേഹത്തിനെതിരെ കുറ്റം ചുമത്താന് സുപ്രീംകോടതി രജിസ്ട്രാര് ജനറല് വിസമ്മതിച്ചതിനെ തുടര്ന്ന് ഡല്ഹി പോലീസ് പോകാന് അനുവദിക്കുകയായിരുന്നു. ചീഫ് ജസ്റ്റിസിന്റെ നിര്ദേശപ്രകാരമാണ് ഇതെന്നാണ് റിപ്പോര്ട്ട്.
രാകേഷ് കിഷോര് എന്ന അഭിഭാഷകന് ചെരിപ്പുകളും രേഖകളും കൈമാറാനും രജിസ്ട്രാര് ജനറല് ഡല്ഹി പോലീസിനോട് ആവശ്യപ്പെട്ടതായി ഇന്ത്യന് എക്സ്പ്രസ് റിപ്പോര്ട്ട് ചെയ്യുന്നു. ഡല്ഹി പോലീസിന്റെ സുരക്ഷാ വിഭാഗവും ന്യൂഡല്ഹി ജില്ലാ പോലീസ് ഉദ്യോഗസ്ഥരും ചേര്ന്നാണ് ചോദ്യം ചെയ്തത്.
രാകേഷ് കിഷോറിന്റെ കൈയില്നിന്ന് ഒരു വെള്ളക്കടലാസിലെഴുതിയ കുറിപ്പ് കണ്ടെടുത്തതായി പോലീസ് പറഞ്ഞു.
സനാതന ധര്മ്മത്തോടുള്ള അനാദരവ് ഇന്ത്യ പൊറുക്കില്ല എന്നടക്കമുള്ള കാര്യങ്ങള് ഈ കുറിപ്പില് എഴുതിയിരുന്നതായി പോലീസ് അറിയിച്ചു. നേരത്തെ ഷൂ എറിയുന്ന ഘട്ടത്തില് ഉദ്യോഗസ്ഥര് പുറത്തേക്ക് കൊണ്ടുപോകുമ്പോഴും ഇയാള് തന്റെ പ്രതിഷേധം ചീഫ് ജസ്റ്റിസിന് നേരെ മാത്രമാണെന്നും ബെഞ്ചിലെ മറ്റൊരു അംഗമായ ജസ്റ്റിസ് വിനോദ് ചന്ദ്രനോട് ക്ഷമ പറയുന്നുവെന്നും അഭിഭാഷകന് പ്രതികരിച്ചു.
നാടകീയ സംഭവങ്ങളില് കുറച്ചുനേരം പരിഭ്രാന്തി നിലനിന്നെങ്കിലും പിന്നീട് കോടതി നടപടികള് തുടര്ന്നു. നേരത്തെ ഒരു കേസ് പരിഗണിക്കുന്നതിനിടയില് ചീഫ് ജസ്റ്റിസ് ബിആര് ഗവായ് നടത്തിയ പരാമര്ശങ്ങളാണ് ഷൂ എറിയാന് ശ്രമിച്ച അഭിഭാഷകനെ പ്രകോപിപ്പിച്ചത് എന്നാണ് വിവരം. ബജാറാവുവിലെ ഏഴടി ഉയരമുള്ള വിഷ്ണുവിന്റെ വിഗ്രഹം പുനസ്ഥാപിക്കണം എന്നാവശ്യപ്പെട്ട് ഒരു കേസ് കോടതിക്ക് മുമ്പില് എത്തിയിരുന്നു. അപ്പോഴാണ് ‘നിങ്ങളുടെ ദൈവത്തോട് പറയൂ’ എന്ന് ചീഫ് ജസ്റ്റിസ് പരാമര്ശിച്ചത്. പരാമര്ശത്തിനെതിരെ വിമര്ശനങ്ങള് ഉയര്ന്നിരുന്നു.
ചിത്രം കടപ്പാട്
