ബെല്ലി ഡാന്സുമായി കല്യാണി; ഐറ്റം നമ്പറില് ആരാധകരെ ഞെട്ടിച്ച് നടി
മലയാള സിനിമയുടെ ചരിത്രത്തിലെ ആദ്യ 300 കോടി ക്ലബ് ചിത്രത്തിലെ കേന്ദ്ര കഥാപാത്രമായ കല്യാണി പ്രിയദര്ശന് ബെല്ലി ഡാന്സുമായി ആരാധകരെ വീണ്ടും ഞെട്ടിച്ചു. രവി മോഹനൊപ്പം പ്രധാന വേഷത്തിലെത്തുന്ന തമിഴ് ചിത്രം ജീനിയിലാണ് കല്യാണി ഐറ്റം നമ്പറില് ഞെട്ടിക്കുന്നത്. സിനിമയിലെ പുറത്തുവന്ന ആദ്യ വീഡിയോ സോംഗിലാണ് താരത്തിന്റെ ഗ്ലാമര് ഡാന്സ് നമ്പറുള്ളത്.
എആര് റഹ്മാന് സംഗീതം നല്കിയ 'അബ്ഡി അബ്ഡി' എന്ന പാട്ടാണ് പുറത്തിറങ്ങിയത്. രവി മോഹനൊപ്പം ചിത്രത്തിലെ മറ്റൊരു നായികയായ കൃതി ഷെട്ടിയും ഒന്നിക്കുന്ന ഡാന്സ് നമ്പറാണിത്. മഷൂക് റഹ്മാന്റേതാണ് വരികള്. മായ്സ കരാ, ദീപ്തി സുരേഷ് എന്നിവരാണ് ഗാനം ആലപിച്ചത്. റാപ് പാടിയത് ഫ്രീക്കും. അറബിക് സ്റ്റൈലിലുള്ള പാട്ടിലെ കല്യാണിയുടെ ചുവടുകള്ക്ക് കയ്യടിക്കുകയാണ് ആരാധകര്.
താന് പുതിയൊരു കാര്യം പരീക്ഷിച്ചുവെന്നും എല്ലാവര്ക്കും ഇഷ്ടപ്പെടുമെന്ന് പ്രതീക്ഷിക്കുന്നതായും പാട്ട് പങ്കുവച്ച് കല്യാണി ഇന്സ്റ്റഗ്രാമില് കുറിച്ചിരുന്നു. 'അഭിനേതാവ് എന്ന നിലയില് മുന്പ് ചെയ്തിട്ടില്ലാത്ത കാര്യങ്ങള് പരീക്ഷിച്ച് വെല്ലുവിളികള് ഏറ്റെടുക്കാന് ഞാന് എപ്പോഴും ശ്രമിക്കാറുണ്ട്. ഈ പാട്ട് അത്തരത്തില് ഒന്നാണ്'- എന്നാണ് കല്യാണി കുറിച്ചത്.
