'ഉദ്ഘാടനങ്ങള്ക്ക് തുണിയുടുക്കാത്ത താരങ്ങള്; മോഹന്ലാല് നടത്തുന്നത് ഒളിഞ്ഞുനോട്ട പരിപാടി- സദാചാര പ്രസംഗവുമായി യു പ്രതിഭ എംഎല്എ
സദാചാര പ്രസംഗവുമായി സിപിഎം എംഎല്എ യു പ്രതിഭ. നാട്ടില് ഉദ്ഘാടനങ്ങള്ക്ക് ഇപ്പോള് തുണിയുടുക്കാത്ത താരങ്ങളെ മതിയെന്നും തുണിയുടുക്കാത്ത താരം വന്നാല് എല്ലാവരും ഇടിച്ചു കയറുകയാണെന്നും പ്രതിഭ പറഞ്ഞു. കട ഉദ്ഘാടനങ്ങള്ക്ക് ഉടുപ്പിടാത്ത സിനിമ താരങ്ങളെയാണ് കൊണ്ടുവരുന്നതെന്നും നമ്മുടെ സമൂഹത്തിന് സിനിമക്കാരോട് ഒരു തരം ഭ്രാന്താണെന്നും യു പ്രതിഭ പറഞ്ഞു.
ഇത്തരം പ്രവണത നിര്ത്താന് പറയണമെന്നും അവരോട് തുണിയുടുത്ത് വരാന് പറയണമെന്നും യു പ്രതിഭ വ്യക്തമാക്കി. ഇത് സദാചാരം എന്ന് പറഞ്ഞ് തന്റെ നേരെ വരരുത്. മാന്യമായി വസ്ത്രം ധരിക്കുകയാണ് വേണ്ടത്. ഇത്രയ്ക്ക് വായിനോക്കികള് ആണോ കേരളത്തിലെ മനുഷ്യര് എന്നും യു പ്രതിഭ പ്രസംഗത്തിനിടെ ചോദിച്ചു.
തുണി ഉടുക്കാനും ഉടുക്കാതിരിക്കാനും സ്വാതന്ത്ര്യം ഉള്ള നാട്ടിലാണ് നമ്മള് ജീവിക്കുന്നതെന്നും പ്രതിഭ പറഞ്ഞു. കഴിഞ്ഞ ദിവസം കായംകുളത്ത് നടന്ന സാംസ്കാരിക പരിപാടിക്കിടെ ആയിരുന്നു പ്രതിഭയുടെ പ്രസംഗം. മോഹന്ലാലിന്റെ ടെലിവിഷന് ഷോയ്ക്ക് എതിരെയും യു പ്രതിഭ വിമര്ശനം ഉന്നയിച്ചു.
മോഹന്ലാല് നടത്തുന്ന ഒരു ഒളിഞ്ഞുനോട്ട പരിപാടിയുണ്ടെന്നും മറ്റുള്ളവര് ഉറങ്ങുന്നത് ഒളിഞ്ഞു നോക്കുകയും അവരുടെ വസ്ത്രം ഇറുങ്ങിയതാണോ എന്ന് കമന്റ് ചെയ്യുകയും ചെയ്യുന്നതാണ് പരിപാടിയെന്നും പ്രതിഭ പറഞ്ഞു. അനശ്വരനടനാണ് ഈ പരിപാടി ചെയ്യുന്നതും പ്രതിഭ വിമര്ശിച്ചു. ജനാധിപത്യത്തില് വരേണ്ടത് താര രാജാക്കന്മാര് അല്ല. ജനങ്ങള്ക്കിടയില് പ്രവര്ത്തിക്കുന്ന പച്ച മനുഷ്യരാണെന്നും ധൈര്യത്തോടെ പറയാന് നമ്മള് തയ്യാറാവണമെന്നും പ്രതിഭ പറഞ്ഞു.
