കൊല്ലം ചവറയില് നാലര വയസുകാരനെ വീടിന് സമീപത്തുള്ള വെള്ളക്കെട്ടില് വീണു മരിച്ച അറ്റ്ലാന് അനീഷിന്റെ സംസ്കാരം ഇന്ന് വൈകീട്ട് 3ന് നടക്കും. അറ്റ്ലാന്റെ പിതാവിന്റെ കുടുംബ വീടായ ഓച്ചിറ പ്രയാര് പുലരി ചന്തപുന്നക്കാട്ട് ഹൗസില് വച്ചാണ് സംസ്കാരം.
യുകെ വെസ്റ്റ് യോര്ക്ഷയറിലെ വേക്ക് ഫീല്ഡില് താമസിക്കുന്ന നീണ്ടകര താഴത്തുരുത്ത് പഴങ്കാലയില് (സോപാനം) അനീഷ് - ഫിന്ല ദിലീപ് ദമ്പതികളുടെ ഏക മകന് അറ്റ്ലാന് അനീഷ് ആണ് മരിച്ചത്. അറ്റ്ലാന് അമ്മയുടെ കുടുംബവീട്ടില് ആയിരുന്നു താമസം. ചൊവ്വാഴ്ച വൈകുന്നേരം മൂന്നരയോടെയാണ് സംഭവം നടന്നത്.
മകന്റെ മരണത്തെ തുടര്ന്ന് ബുധനാഴ്ച വൈകിട്ട് 7.30 ഓടെ മാതാപിതാക്കള് നാട്ടിലെത്തിയിരുന്നു. മകന്റെ വിയോഗം താങ്ങാനാകാതെ കരയുന്ന മാതാപിതാക്കളെ എങ്ങനെ ആശ്വസിപ്പിക്കണമെന്ന അവസ്ഥയിലാണ് പ്രിയപ്പെട്ടവര്.
നീണ്ടകര പരിമണത്തെ പ്ലേ സ്കൂളില് പഠിക്കുന്ന അറ്റ്ലാന്, സ്കൂളിന്റെ വാഹനത്തില് വന്നിറങ്ങി അപ്പൂപ്പന് ദിലീപിനൊപ്പം വീട്ടിലേക്കു വരുന്നതിനിടെയാണ് അപകടം ഉണ്ടായത്. ഗേറ്റ് തുറന്ന് അപ്പൂപ്പന് അകത്തു കയറിയപ്പോള് കുട്ടി അപ്പൂപ്പന്റെ കൈ വിട്ട് വെളിയിലേക്ക് ഓടിപ്പോയി. കുട്ടിയുടെ ബാഗ് വീട്ടില് വച്ച ശേഷം ദിലീപ് കുട്ടിയെ അന്വേഷിച്ചിറങ്ങുകയായിരുന്നു.
എന്നാല്, കണ്ടെത്താന് കഴിഞ്ഞില്ല. തുടര്ന്ന് വീട്ടുകാരും നാട്ടുകാരും ചേര്ന്ന് നടത്തിയ അന്വേഷണത്തിലാണ് സമീപത്തെ കൈത്തോട്ടില് വെള്ളക്കെട്ടില് വീണ നിലയില് കുട്ടിയെ കണ്ടെത്തിയത്. തുടര്ന്ന് കുട്ടിയെ ഉടന് തന്നെ ജില്ലാ ആശുപത്രിയില് എത്തിച്ചെങ്കിലും ജീവന് രക്ഷിക്കാന് സാധിച്ചില്ല.
