പ്രകൃതി സൗഹൃദത്തിന്റെ ഭാഗമായി പെട്രോള്, ഡീസല് വാഹനങ്ങള് ഒഴിവാക്കി ഇലക്ട്രിക് വാഹനങ്ങള് വാങ്ങിയ ഡ്രൈവര്മാരെ ലക്ഷ്യമിട്ട് റോഡ് ചാര്ജിംഗ് ടാക്സുമായി റേച്ചല് റീവ്സ്. വില കൂടുതലായിട്ടും പ്രകൃതി സ്നേഹം പരിഗണിച്ചു ഇവി വാഹനങ്ങള് എടുത്തവരെ പോക്കറ്റടിക്കാനാണ് ഇപ്പോള് ചാന്സലര് നീക്കം നടത്തുന്നത്. ഫ്യൂവല് ഡ്യൂട്ടിയിലെ കുറവ് പരിഹരിക്കാന് ആണ് പുതിയ തന്ത്രം.
ഈ മാസം അവതരിപ്പിക്കുന്ന ബജറ്റില് പുതിയ റോഡ് ചാര്ജ്ജിംഗ് ടാക്സ് ഏര്പ്പെടുത്താനാണ് ചാന്സലറുടെ ശ്രമം. ഇലക്ട്രിക് വാഹനങ്ങള് ഉപയോഗിക്കുന്നവരെയാണ് ഇത് ലക്ഷ്യം വെയ്ക്കുന്നത്. മറ്റ് റോഡ് നികുതികള്ക്ക് പുറമെ ഓരോ മൈലിനും 3 പെന്സ് വീതം ഇവികള്ക്ക് ചാര്ജ്ജ് ഏര്പ്പെടുത്തുമെന്നാണ് ട്രഷറി സ്രോതസുകള് വെളിപ്പെടുത്തുന്നത്.
ഇതോടെ 2028 ആകുന്നതോടെ ശരാശരി ഡ്രൈവര്ക്ക് പ്രതിവര്ഷം 250 പൗണ്ടാണ് നല്കേണ്ടി വരിക. ഇതിന് പുറമെ ഹൈബ്രിഡ് കാറുകള്ക്കും പുതിയ ചാര്ജ് വരും. എന്നിരുന്നാലും ഈ നിരക്ക് താരതമ്യേന കുറവായിരിക്കും. ഫ്യൂവല് ഡ്യൂട്ടി വരുമാനം കുറയുന്ന സാഹചര്യത്തിലാണ് പുതിയ നികുതി ഏര്പ്പെടുത്തുന്നത്.
കൂടുതല് ഡ്രൈവര്മാര് ഗ്രീന് എനര്ജിയിലേക്ക് നീങ്ങുന്നത് ട്രഷറിയുടെ വരുമാനം കുറയ്ക്കുന്നുണ്ട്. സ്കീം ആരംഭിക്കുന്ന സമയം കൊണ്ട് നിരത്തുകളില് ആറ് മില്ല്യണ് അധിക ഇവികള് എത്തുമെന്നാണ് കരുതുന്നത്.
