'പഴയ രചനകള് മാത്രമല്ല മികച്ചത്, തീരുമാനം ഏകകണ്ഠം'; വേടന്റെ അവാര്ഡില് പ്രതികരിച്ച് ജൂറി അംഗം ഗായത്രി
റാപ്പര് വേടന്റെ സംസ്ഥാന ചലച്ചിത്ര അവാര്ഡ് വിവാദത്തില് പ്രതികരിച്ച് ജൂറി അംഗം ഗായിക ഗായത്രി. പഴയ രചനകള് മാത്രമല്ല മികച്ചതെന്നും ജൂറി ഏകകണ്ഠമായാണ് വേടന് അവാര്ഡ് നല്കാന് തീരുമാനിച്ചതെന്നും ഗായത്രി അശോകന് പറഞ്ഞു. സംഗീതത്തിലെ വിപ്ലവകരമായ മാറ്റങ്ങളെ ഉള്ക്കൊള്ളണമെന്നും ഓരോ സംഗീത ശൈലിക്കും അതിന്റെതായ മഹത്വമുണ്ടെന്നും ഗായത്രി പറഞ്ഞു. വിമര്ശനങ്ങളെ കാര്യമാക്കുന്നില്ലെന്നും ഗായത്രി സൂചിപ്പിച്ചു.
ഏഷ്യാനെറ്റ് ന്യൂസിനോടായിരുന്നു ഗായത്രിയുടെ പ്രതികരണം. 2024 സംസ്ഥാന ചലച്ചിത്ര അവാര്ഡ് പ്രഖ്യാപിച്ചപ്പോള് മികച്ച ഗാനരചിതാവായി വേടനെയാണ് തിരഞ്ഞെടുത്തത്. എന്നാല് ഇതിന് പിന്നാലെ നിരവധി വിമര്ശനങ്ങളാണ് സോഷ്യല്മീഡിയയിലടക്കം ഉയര്ന്നുവന്നത്.
ലൈംഗിക ആരോപണങ്ങള് നേരിടുന്നതിനിടെ വേടന് അവാര്ഡ് നല്കിയതും ചര്ച്ചയായിരുന്നു. 2021 ല് ഹോം ചിത്രത്തിന്റെ നിര്മാതാവിനെതിരേ ആരോപണവും കേസുമുണ്ടായതിനെത്തുടര്ന്ന് അഭിനേതാക്കള്ക്കും അവാര്ഡ് നിഷേധിച്ചിരുന്നുവെന്നും എന്നാല് നിലവില് ബലാത്സംഗ കേസിലും കഞ്ചാവ് കേസിലും ഉള്പ്പെട്ടിട്ടും വേടന് അവാര്ഡ് നല്കിയതുമാണ് പലരും ചൂണ്ടിക്കാട്ടിയത്.
