യുകെയിലെ ആദ്യത്തെ നിര്മ്മിത ബുദ്ധി (എ ഐ) നഗരം പണിയുന്നതിനുള്ള പദ്ധതി ഹൗസിംഗ് സെക്രട്ടറി വെളിപ്പെടുത്തി. പുതിയ ആധുനീക ഉദ്യാന നഗരങ്ങളിലെ പ്രധാന ഭാഗങ്ങളിലെയെല്ലാം അടിസ്ഥാന സൗകര്യങ്ങള് ഓട്ടോമേറ്റ് ചെയ്യുവാനുള്ള നിര്ദ്ദേശമാണ് സര്ക്കാര് മുന്നോട്ട് വച്ചിരിക്കുന്നത്. റോഡുകള്, ഷോപ്പുകള്, കെയര് ഹോമുകള് എന്നിവയെല്ലാം നിര്മ്മിത ബുദ്ധിയുടെയും റോബോട്ടിക്സിന്റെയും സഹായത്തോടെ പ്രവര്ത്തിക്കുന്ന ഒരു നഗരമാണ് സ്വപ്നം കാണുന്നതെന്നും മന്ത്രി കൂട്ടിച്ചേര്ത്തു.
അടുത്ത പൊതുതെരഞ്ഞെടുപ്പിന് മുന്പായി മൂന്ന് പുതിയ പട്ടണങ്ങളുടെ നിര്മ്മാണം ആരംഭിക്കുമെന്നായിരുന്നു ലേബര് പാര്ട്ടിയുടെ വാഗ്ദാനം. പുതിയ പട്ടണങ്ങള് നിര്മ്മിക്കാന് അനുയോജ്യമായ 12 ഇടങ്ങളുടെ പട്ടിക ഒരു സ്വതന്ത്ര കമ്മിറ്റി തയ്യാറാക്കിയ റിപ്പോര്ട്ടില് ഇടംപിടിച്ചിട്ടുണ്ട്.
അഞ്ച് വര്ഷക്കാലം കൊണ്ട് ഇംഗ്ലണ്ടില് 15 ലക്ഷം വീടുകള് നിര്മ്മിക്കുമെന്ന ലേബര് പാര്ട്ടിയുടെ വാഗ്ദാനത്തിന്റെ ഒരു പ്രധാന ഭാഗമാണ് ഈ 'ഭാവിയുടെ പട്ടണങ്ങള്'. ഇരുപതാം നൂറ്റാണ്ടിന്റെ ആദ്യകാലത്ത് ബ്രിട്ടനില് നിര്മ്മിച്ച ഉദ്യാന നഗരങ്ങളുടെ മാതൃകയിലായിരിക്കും ഇവ നിര്മ്മിക്കുക.
