രാഹുല് മാങ്കൂട്ടത്തിലിനെ പുറത്താക്കി കോണ്ഗ്രസ്, എംഎല്എ സ്ഥാനവും നഷ്ടമാകും
ലൈംഗിക പീഡന കേസില് കോടതിവിധിക്ക് പിന്നാലെ പാലക്കാട് എംഎല്എ രാഹുല് മാങ്കൂട്ടത്തിലിനെ കോണ്ഗ്രസില് നിന്നും പുറത്താക്കി. ഇതുസംബന്ധിച്ച് കെപിസിസി അധ്യക്ഷണ് വാര്ത്താകുറിപ്പ് പുറത്തിറക്കി. പാര്ട്ടിയുടെ പ്രാഥമിക അംഗത്വത്തില് നിന്നുമാണ് പുറത്താക്കിയത്. സത്യപ്രതിജ്ഞ ചെയ്ത് എംഎല്എ ആയി സ്ഥാനമേറ്റെടുത്ത് കൃത്യം ഒരുവര്ഷം തികയുമ്പോഴാണ് കോണ്ഗ്രസില് നിന്നും ഈ പുറത്താക്കല്.
നിലവില് സസ്പെന്ഷനിലുള്ള രാഹുല് മാങ്കൂട്ടത്തിലിനെ ഉയര്ന്ന പരാതികളുടെയും രജിസ്റ്റര് ചെയ്ത കേസുകളുടെയും അടിസ്ഥാനത്തില് കോണ്ഗ്രസിന്റെ പ്രാഥമിക അംഗത്വത്തില് നിന്നും പുറത്താക്കിയതായി കെപിസിസി പ്രസിഡന്റ് സണ്ണി ജോസഫ് എംഎല്എ അറിയിച്ചു. നേതാക്കള് തമ്മിലുള്ള കൂടിയാലോചനയ്ക്ക് ശേഷമാണ് തീരുമാനം. രാഹുല് മാങ്കൂട്ടത്തില് എംഎല്എ സ്ഥാനം രാജിവെക്കുന്നതാണ് നല്ലതെന്ന് അടൂര് പ്രകാശ് പ്രതികരിച്ചു. രാഹുല് മാങ്കൂട്ടത്തില് എംഎല്എ സ്ഥാനം രാജിവെക്കണമെന്ന നിലപാടിലാണ് കോണ്ഗ്രസ് നേതൃത്വം. രാഹുല് എംഎല്എ സ്ഥാനം രാജിവെയ്ക്കുന്നതാണ് നല്ലതെന്ന് കെപിസിസി പ്രസിഡന്റ് സണ്ണി ജോസഫും വ്യക്തമാക്കി.
പാര്ട്ടി കൈവിട്ടതോടെ സ്വയം എംഎല്എ രാജി വെച്ചില്ലെങ്കിലും രാഹുലിന് രക്ഷയുണ്ടാകില്ല. രാഹുലിനെ രാജിവെപ്പിക്കാന് കോണ്ഗ്രസ് ചീഫ് വിപ്പിന് സ്പീക്കര്ക്ക് കത്ത് നല്കാനാകും. സ്വയം ഒഴിയാന് തയാറായില്ലെങ്കില് സ്പീക്കര്ക്ക് കോണ്ഗ്രസ് കത്ത് നല്കുമെന്നാണ് സൂചന.
ലൈംഗിക പീഡന പരാതിയില് രാഹുല് മാങ്കൂട്ടത്തിലിന്റെ മുന്കൂര് ജാമ്യാപേക്ഷ തിരുവനന്തപുരം പ്രിന്സിപ്പല് സെഷന്സ് കോടതി ഇന്ന് തള്ളിയിരുന്നു. ഇന്നലെ ഒന്നേമുക്കാല് മണിക്കൂറും ഇന്ന് ഇരുപത്തിയഞ്ച് മിനിറ്റും വാദം കേട്ടതിന് ശേഷമാണ് വിധി പറഞ്ഞത്.
നിര്ബന്ധിത ഗര്ഭഛിദ്രത്തിന് തെളിവുണ്ടെന്നും പ്രതിക്ക് മുന്കൂര് ജാമ്യം അനുവദിക്കുന്നത് തെളിവ് നശിപ്പിക്കാന് കാരണമാകുമെന്നുമാണ് പ്രോസിക്യൂഷന് വാദിച്ചത്. പൊലീസ് റിപ്പോര്ട്ടിലും പ്രതിക്കെതിരെ ഗുരുതര പരാമര്ശങ്ങളാണുള്ളത്. കൂടാതെ മെഡിക്കല് തെളിവുകളും ഡിജിറ്റല് തെളിവുകളുമുണ്ട്. കുറ്റങ്ങള് പ്രഥമദൃഷ്ട്യാ നിലനില്ക്കുന്ന സാഹചര്യത്തിലാണ് കോടതിയുടെ നടപടി. യുവതിയെ ക്രൂരമായി ഉപദ്രവിച്ചു. കടുത്ത മാനസിക സമ്മര്ദത്തിലേക്ക് തള്ളിവിട്ടതായും പ്രോസിക്യൂഷന് കോടതിയെ അറിയിച്ചു. ഇതിന്റെ അടിസ്ഥാനത്തിലാണ് മുന്കൂര് ജാമ്യം തള്ളിയത്.
യുവതിയെ പീഡിപ്പിച്ച് ഗര്ഭിണിയാക്കി നിര്ബന്ധിച്ച് ഗര്ഭച്ഛിദ്രം നടത്തിയെന്നാണ് രാഹുലിനെതിരായ കേസ്. മുഖ്യമന്ത്രിക്ക് യുവതി നല്കിയ പരാതിയിലാണ് കേസ് രജിസ്റ്റര് ചെയ്ത് പ്രത്യേക സംഘം അന്വേഷണം ആരംഭിച്ചത്. രാഹുല് മാങ്കൂട്ടത്തിലിനെതിരെ കേരളത്തിനു പുറത്തുള്ള മറ്റൊരു സ്ത്രീ നല്കിയ പരാതിയിലും പൊലീസ് കേസെടുത്തിട്ടുണ്ട്. ബലാത്സംഗക്കുറ്റം ചുമത്തി ക്രൈം ബ്രാഞ്ച് ആണ് കേസ് രജിസ്റ്റര് ചെയ്തത്. നിലവിലുള്ള കേസ് അന്വേഷിക്കുന്ന പ്രത്യേക സംഘംതന്നെയാണ് ഈ കേസും അന്വേഷിക്കുന്നത്.
യൂത്ത് കോണ്ഗ്രസ് സംസ്ഥാന അധ്യക്ഷനായി പാര്ട്ടിയിലെ തീപ്പൊരി നേതാവായി പൊടുന്നനെ വളര്ന്ന ശേഷമായിരുന്നു രാഹുലിന്റെ പതനം.
