രാഹുല് മാങ്കൂട്ടത്തിലിന്റെ അറസ്റ്റ് താത്കാലികമായി തടഞ്ഞ് ഹൈക്കോടതി
ബലാത്സംഗ കേസില് ഒളിവില് കഴിയുന്ന പാലക്കാട് എംഎല്എ രാഹുല് മാങ്കൂട്ടത്തിലിന്റെ അറസ്റ്റ് തടഞ്ഞ് ഹൈക്കോടതി. ഈ മാസം 15 വരെ അറസ്റ്റ് പാടില്ലെന്ന് ഹൈക്കോടതി അറിയിച്ചു. 15 ന് മുന്കൂര് ജാമ്യാപേക്ഷ വീണ്ടും പരിഗണിക്കും. തെരഞ്ഞെടുപ്പിന് ശേഷമായിരിക്കും കേസ് ഇനി പരിഗണിക്കുക. കേസില് വിശദവാദം കേള്ക്കണമെന്ന് കോടതി വ്യക്തമാക്കി. കേസ് ഡയറി ഹാജരാക്കാനും കോടതി നിര്ദേശം നല്കിയിട്ടുണ്ട്.
ഇന്നലെയാണ് മുന്കൂര് ജാമ്യാപേക്ഷയുമായി രാഹുല് ഹൈക്കോടതിയെ സമീപിച്ചത്. തിരുവനന്തപുരം പ്രിന്സിപ്പല് സെഷന്സ് കോടതി രാഹുലിന്റെ മുന്കൂര് ജാമ്യാപേക്ഷ തള്ളിയിരുന്നു. തുടര്ന്നാണ് ഇന്നലെ ഹൈക്കോടതിയില് ഹര്ജി നല്കിയത്. പത്താം ദിവസവും രാഹുല് ഒളിവില് തുടരുമ്പോഴാണ് ഹൈക്കോടതിയുടെ അറസ്റ്റ് തടഞ്ഞുള്ള തീരുമാനം വന്നിട്ടുള്ളത്. ജസ്റ്റിസ് കെ ബാബുവിന്റെ ബെഞ്ചാണ് ഹര്ജി പരിഗണിച്ചത്. 32-ാം ഐറ്റമായിട്ടാണ് പരിഗണിക്കേണ്ടിയിരുന്നത്. എന്നാല് സിറ്റിംഗ് തുടങ്ങിയ ഉടന് തന്നെ രാഹുലിന്റെ അഭിഭാഷകന് ഹര്ജിയുമായി ബന്ധപ്പെട്ട കാര്യം അറിയിച്ചു. തുടര്ന്നാണ് ഹൈക്കോടതി ഉത്തരവ് പറഞ്ഞത്.
തത്ക്കാലത്തേക്ക് അറസ്റ്റ് തടഞ്ഞുകൊണ്ടുള്ള ഇടക്കാല ഉത്തരവാണ് ഇപ്പോള് പുറത്തുവന്നിരിക്കുന്നത്. ഹര്ജിയില് വാദം കേട്ടിട്ടില്ല. വിശദമായ വാദം കേട്ടതിന് ശേഷമേ ഇക്കാര്യത്തില് ഒരു തീരുമാനത്തിലേക്ക് പോകാവൂ എന്ന് ജസ്റ്റീസ് കെ ബാബുവിന് മുന്നില് അഭിഭാഷകന് ഉന്നയിച്ചു. തുടര്ന്നാണ് ഇക്കാര്യത്തില് ഇടക്കാല ഉത്തരവ് പുറപ്പെടുവിക്കുന്നതായും രാഹുല് മാങ്കൂട്ടത്തിലിന്റെ അറസ്റ്റ് തത്ക്കാലത്തേക്ക് തടയുന്നതായും ജസ്റ്റിസ് കെ ബാബു അറിയിച്ചത്.
രാഹുലിന്റെ അറസ്റ്റ് തടഞ്ഞ നടപടിയില് പ്രതികരണങ്ങള് വേണ്ടെന്നാണ് കെ.പി.സി.സി തീരുമാനം. രാഹുല് വിഷയത്തില് ഇനി ഇടപെടലുകള് വേണ്ടെന്നും അറസ്റ്റ് ചെയ്താലും അറസ്റ്റ് തടഞ്ഞാലും പാര്ട്ടിയെ ബാധിക്കുന്ന വിഷയമല്ലെന്നും നിര്ദേശം നല്കി. സമൂഹമാധ്യമങ്ങളില് അമിതാഹ്ളാദം നടത്തരുതെന്ന് പ്രവര്ത്തകര്ക്ക് കെപിസിസി നിര്ദേശം നല്കി.
