ഇംഗ്ലണ്ടില് പ്രസവത്തിന് പിന്നാലെ ഉണ്ടാകുന്ന ഗുരുതര രക്തസ്രാവത്തിന്റെ തോത് വലിയതോതില് കൂടുന്നത് ആശങ്കപ്പെടുത്തുന്നു. പ്രസവശേഷമുള്ള രക്തസ്രാവം കഴിഞ്ഞ അഞ്ച് വര്ഷത്തിനിടയിലെ ഏറ്റവും ഉയര്ന്ന നിലയിലെത്തിയതായുള്ള റിപോര്ട്ടുകള് പുറത്തുവന്നു. 2020-ല് ആയിരം പ്രസവങ്ങള്ക്ക് 27 കേസുകളായിരുന്നെങ്കില്, ഇപ്പോള് അത് 32 ആയാണ് ഉയര്ന്നിരിക്കുന്നത്. ഇതോടെ അപകടസാധ്യതയില് 19 ശതമാനം വര്ധനവ് ആണ് ഉണ്ടായിരിക്കുന്നത്. പ്രസവങ്ങളുടെ എണ്ണം കുറയുമ്പോഴും രക്തസ്രാവ കേസുകള് ഉയരുന്നത് എന്എച്ച്എസ് മാതൃത്വ സേവനങ്ങളുടെ ഗുണനിലവാരത്തെ കുറിച്ച് കടുത്ത ആശങ്ക ആണ് ഉയര്ത്തുന്നത്.
കഴിഞ്ഞ വര്ഷം മാത്രം 16,780 സ്ത്രീകള്ക്ക് പ്രസവശേഷം കുറഞ്ഞത് 1.5 ലിറ്റര് രക്തം നഷ്ടമായി. ലോകത്ത് മാതൃത്വ മരണങ്ങള്ക്ക് പ്രധാന കാരണങ്ങളിലൊന്നാണ് ഈ രക്തസ്രാവം. യുകെയില് നടക്കുന്ന മാതൃത്വ മരണങ്ങളില് ഏകദേശം ഏഴു ശതമാനത്തിനും ഇതാണ് കാരണം. പല സ്ത്രീകള്ക്കും സാധാരണ രക്തസ്രാവം ഉണ്ടാകാറുണ്ടെങ്കിലും, അമിതമായ രക്തനഷ്ടം ഗുരുതര അപകടമായി മാറുന്നുവെന്നാണ് റിപ്പോര്ട്ട് ചൂണ്ടിക്കാട്ടുന്നത്.
ഗര്ഭധാരണം കൂടുതല് സങ്കീര്ണ്ണമാകുന്നതാണ് രക്തസ്രാവ വര്ധനവിന് കാരണമെന്ന് വിദഗ്ധര് പറയുന്നു. അമിതവണ്ണം, പ്രായം കൂടിയതിനു ശേഷം ഗര്ഭം ധരിക്കല്, ഉയര്ന്ന രക്തസമ്മര്ദ്ദം തുടങ്ങിയവ അപകടസാധ്യത വര്ധിപ്പിക്കുന്നു. ഇതിനിടെ, സുരക്ഷിതമല്ലെന്ന് വിലയിരുത്തപ്പെട്ട നിരവധി പ്രസവ കേന്ദ്രങ്ങളെ മെച്ചപ്പെടുത്താന് അടിയന്തര നടപടികള് വേണമെന്ന ആവശ്യവും ശക്തമായി ഉയരുകയാണ്. മാതൃത്വ പരിചരണം മെച്ചപ്പെടുത്താന് ദേശീയ തലത്തില് പുതിയ ഇടപെടലുകള് ഉണ്ടാകുമെന്ന് സര്ക്കാര് അറിയിച്ചിട്ടുണ്ട്.
