മലയാളിയെ ചിരിപ്പിക്കുകയും ചിന്തിപ്പിക്കുകയും ചെയ്ത ബഹുമുഖ പ്രതിഭ; ശ്രീനിവാസന് വിട
മലയാള സിനിമയില് കാലത്തിനതീതമായി ചിരിയുടെയും ചിന്തയുടെയും കഥാപാത്രങ്ങളും സന്ദര്ഭങ്ങളും സൃഷ്ടിച്ച അതുല്യ പ്രതിഭ നടനും സംവിധായകനും തിരക്കഥാകൃത്തുമായ ശ്രീനിവാസന് (69)വിടവാങ്ങി. രോഗബാധിതനായി എറണാകുളം ഉദയംപേരൂരിലെ വീട്ടില് വിശ്രമത്തിലായിരുന്ന ശ്രീനിവാസനെ ഇന്നു രാവിലെ ഡയാലിസിസിനായി കൊണ്ടുകൊണ്ടുപോകവേ ദേഹാസ്വാസ്ഥ്യം അനുഭവപ്പെട്ടതിനെ തുടര്ന്ന് തൃപ്പൂണിത്തുറ താലൂക്ക് ആശുപത്രിയില് പ്രവേശിപ്പിക്കുകയായിരുന്നു. രാവിലെ 8.30ന് ആശുപത്രിയില് വച്ചായിരുന്നു അന്ത്യം.
ആക്ഷേപഹാസ്യത്തിന്റെ സാധ്യതകള് വളരെ ഭംഗിയായി ഉപയോഗിച്ച സിനിമാ പ്രവര്ത്തകന് വേറെയുണ്ടാവില്ല. 48 വര്ഷക്കാലം നീണ്ടുനിന്ന സിനിമാ ജീവിതത്തില് 200ലേറെ സിനിമകളില് ശ്രീനിവാസന് അഭിനയിച്ചു. 1956 ഏപ്രില് 26ന് കണ്ണൂരിലെ പാട്യത്ത് ജനിച്ച ശ്രീനിവാസന് കൂത്തുപറമ്പ് മിഡില് സ്കൂള്, കതിരൂര് ഗവണ്മെന്റ് ഹൈസ്കൂള് എന്നിവിടങ്ങളില് പ്രാഥമിക വിദ്യാഭ്യാസം പൂര്ത്തിയാക്കി. മട്ടന്നൂര് പഴശ്ശിരാജ എന്എസ്എസ് കോളേജില് നിന്ന് ഇക്കണോമിക്സില് ബിരുദം നേടി.
മദ്രാസിലെ ഫിലിം ചേംബര് ഇന്സ്റ്റിറ്റ്യൂട്ടില് നിന്ന് സിനിമാ അഭിനയത്തില് ഡിപ്ലോമ നേടിയ ശ്രീനിവാസന് തുടക്ക കാലത്ത് ഡബ്ബിംഗ് ആര്ട്ടിസ്റ്റെന്ന നിലയിലും പ്രവര്ത്തിച്ചിരുന്നു. സിനിമാ പഠനകാലത്ത് രജനികാന്ത് ശ്രീനിവാസന്റെ സഹപാഠിയായിരുന്നു.
1977ല് പി എ ബക്കര് സംവിധാനം ചെയ്ത മണിമുഴക്കത്തിലൂടെയാണ് സിനിമയിലേയ്ക്ക് വരുന്നത്. പിന്നീട് 1984ല് 'ഓടരുത് അമ്മാവാ ആളറിയാം' എന്ന സിനിമയുടെ തിക്കഥാകൃത്തെന്ന നിലയില് മലയാള സിനിമയില് ശ്രീനിവാസന് വരവറിയിച്ചു. സാമൂഹിക വിഷയങ്ങളെ നര്മ്മരസം ചേര്ത്ത് ശ്രീനിവാസന് തിരക്കഥകളൊരുക്കിയപ്പോള് മലയാളിക്ക് ഹാസ്യത്തിന്റെയും ആക്ഷേപഹാസ്യത്തിന്റെയും നവ്യാനുഭവങ്ങള് കൂടിയാണ് സ്വന്തമായത്.
1989ല് പുറത്തിറങ്ങിയ വടക്കുനോക്കി യന്ത്രമായിരുന്നു ശ്രീനിവാസന് ആദ്യമായി സംവിധാനം ചെയ്ത സിനിമ. മികച്ചൊരു സംവിധായകന്റെ വരവറിയിച്ച സിനിമയായിരുന്നു വടക്കുനോക്കി യന്ത്രമെങ്കിലും അഭിനയത്തിലും തിരക്കഥാ രചനയിലുമായിരുന്ന ശ്രീനിവാസന് കൂടുതല് ശ്രദ്ധകേന്ദ്രീകരിച്ചത്. ശ്രീനിവാസന് സംവിധാനം ചെയ്ത മറ്റൊരു ചിത്രമായ ചിന്താവിഷ്ടയായ ശ്യാമള മലയാളിയുടെ ജീവിതപരിസരങ്ങളിലെ കാപട്യങ്ങളെ ആക്ഷേപഹാസ്യത്തിലൂടെ വരച്ചിട്ടു. ഒരു സ്ത്രീപക്ഷ സിനിമയെന്ന് കൂടി വിശേഷിപ്പിച്ച് പോകാവുന്ന സിനിമയാണ് ചിന്താവിഷ്ടയായ ശ്യാമള. മലയാള സിനിമയിലെ ഏറ്റവും ചിന്തോദ്ദീപമായ സാമൂഹ്യ വിമര്ശന സിനിമകളുടെ പട്ടികയെടുത്താല് ശ്രീനിവാസന് എന്ന എഴുത്തുകാരന്റെ പ്രതിഭാവിലാസം വ്യക്തമാണ്. ശ്രീനി രചന നിര്വഹിച്ച സന്ദേശം, വരവേല്പ്പ് എന്നീ ചിത്രങ്ങള് ഇന്നും പ്രസക്തമായ കാലിക വിഷയങ്ങളാണ്.
