മാസങ്ങള് നീണ്ട പരിശ്രമങ്ങള്ക്കൊടുവില് പി വി അന്വറും സി കെ ജാനുവും യുഡിഎഫില്. അസോസിയേറ്റ് അംഗങ്ങളാക്കാന് യുഡിഎഫ് യോഗത്തില് ധാരണയായി. ഇരുവര്ക്കും പുറമെ വിഷ്ണുപുരം ചന്ദ്രശേഖരനെയും മെമ്പറായി പരിഗണിക്കും. അതേസമയം ഇക്കാര്യത്തില് കേരള കോണ്ഗ്രസ് എം നിലപാട് പറയട്ടെയെന്നും യോഗം വ്യക്തമാക്കി. അങ്ങോട്ട് പോയി ചര്ച്ചയില്ലെന്നാണ് തീരുമാനം.
തദ്ദേശതിരഞ്ഞെടുപ്പില് യുഡിഎഫിമായി സഹകരിച്ചവരെയാണ് അസോസിയേറ്റ് അംഗങ്ങളാക്കാന് തീരുമാനമായത്. നിയമസഭാ തിരഞ്ഞെടുപ്പ് മുന്നോടിയായി യുഡിഎഫിന്റെ അടിത്തറ വിപുലീകരിക്കുക എന്ന ഉദ്ദേശത്തില് കൂടിയാണിത്. തദ്ദേശ തിരഞ്ഞെടുപ്പില് പൂര്ണമായും സഹകരിക്കുന്ന നിലപാടായിരുന്നു പി വി അന്വറിന്റെ ഭാഗത്ത് നിന്നുണ്ടായത്. വരുന്ന നിയമസഭാ തിരഞ്ഞെടുപ്പ് കൂടി മുന്നില് കണ്ടുകൊണ്ടാണ് മുന്നണി ശക്തമാക്കുന്നതിനായുള്ള നിര്ണായക തീരുമാനം.
ജോസ് കെ മാണി വിഭാഗത്തെ കൂടി അസോസിയേറ്റ് മെമ്പര്ഷിപ്പിലേക്കോ മുന്നണിയിലേക്കോ പരിഗണിക്കാമെന്നുള്ള കാര്യം ചര്ച്ചചെയ്തെങ്കിലും പി ജെ ജോസഫ് അടക്കമുള്ളവര് ആ അജണ്ടയെ തന്നെ എതിര്ത്തുകൊണ്ട് രംഗത്തെത്തുകയായിരുന്നു. അതേസമയം വരാനിരിക്കുന്ന നിയമസഭ തെരഞ്ഞെടുപ്പില് നേരത്തെ ഒരുങ്ങാനുള്ള തീരുമാനത്തിലാണ് യുഡിഎഫ്. സീറ്റ് വിഭജനം നേരത്തെ തീര്ക്കും. ജനുവരിയില് സീറ്റ് വിഭജനം തീര്ക്കാന് യോഗത്തില് ധാരണയായിട്ടുണ്ട്.
