ശമ്പളതര്ക്കത്തെ തുടര്ന്ന് അഞ്ച് ദിവസത്തെ പണിമുടക്ക് നടത്തിയ ശേഷം ജോലിസ്ഥലത്തേക്ക് മടങ്ങിഎത്തിയ ഇംഗ്ലണ്ടിലെ ഡോക്ടര്മാര് മുന്നറിയിപ്പുമായി രംഗത്ത്. ശമ്പള വര്ധന ഉള്പ്പെടെയുള്ള ആവശ്യങ്ങളില് സര്ക്കാര് ഗൗരവമുള്ള സമീപനം സ്വീകരിക്കണമെന്ന് അവര് ആവശ്യപ്പെട്ടു. സമരം അവസാനിച്ചെങ്കിലും, ആവശ്യങ്ങള് പരിഹരിക്കപ്പെടാത്ത പക്ഷം പ്രതിഷേധങ്ങള് വീണ്ടും ശക്തമാകുമെന്ന മുന്നറിയിപ്പും ഡോക്ടര്മാരുടെ സംഘടനകള് നല്കിയിട്ടുണ്ട്.
അതേസമയം, പുതുവര്ഷത്തില് ഈ തര്ക്കം അവസാനിപ്പിക്കാനാകുമെന്ന് പ്രതീക്ഷിക്കുന്നതായി ഹെല്ത്ത് സെക്രട്ടറി വെസ് സ്ട്രീറ്റിംഗ് വ്യക്തമാക്കി. ട്രെയിനിംഗും, തൊഴില് സുരക്ഷയും സംബന്ധിച്ചുള്ള പുതിയ ഗവണ്മെന്റ് ഓഫര് ബിഎംഎ അംഗങ്ങള് തള്ളിയതോടെയാണ് സമരത്തിലേക്ക് കാര്യങ്ങള് എത്തിയത്. കൂടുതല് ശമ്പളവും, മെച്ചപ്പെട്ട പരിഗണനയും നല്കുന്ന രാജ്യങ്ങള് ഡോക്ടര്മാരെ കൊണ്ടുപോകുകയാണെന്ന് ബിഎംഎ റസിഡന്റ് ഡോക്ടര് നേതാവ് ഡോ. ജാക്ക് ഫ്ളെച്ചര് പറയുന്നു.
കൂടാതെ ക്വാളിഫൈഡ് ഡോക്ടര്മാര്ക്ക് സ്പെഷ്യലൈസ് ചെയ്യാന് കൂടുതല് ട്രെയിനിംഗ് സീറ്റുകള് വേണമെന്നും ഇവര് ആവശ്യപ്പെടുന്നു.
2023 മുതല് നടത്തുന്ന 14-ാമത്തെ പണിമുടക്കില് 65% പങ്കാളിത്തം ഉണ്ടായെന്ന് ഡോക്ടര്മാരുടെ യൂണിയന് പറയുന്നു. 2008നെ അപേക്ഷിച്ച് 20 ശതമാനത്തോളം വരുമാനക്കുറവാണ് തങ്ങള് നേരിടുന്നതെന്നാണ് ഇവരുടെ വാദം. ഈ വര്ഷം 5.4 ശതമാനം വര്ദ്ധനവാണ് ഗവണ്മെന്റ് അനുവദിച്ചത്. 26 ശതമാനം വര്ധന വേണമെന്നാണ് ഇവരുടെ ആവശ്യം.
