പ്രതിഷേധങ്ങള്‍ ഫലം കണ്ടതിന്റെ ഭാഗമായി കര്‍ഷകര്‍ ഇന്‍ഹെറിറ്റന്‍സ് ടാക്‌സ് നല്‍കിത്തുടങ്ങുന്ന പരിധി 1 മില്ല്യണ്‍ പൗണ്ടില്‍ നിന്നും 2.5 മില്ല്യണിലേക്ക് ഉയര്‍ത്തി. ഫാമിലി ഫാം ടാക്‌സില്‍ പ്രധാനമന്ത്രി ഇളവ് പ്രഖ്യാപിക്കാന്‍ നിര്‍ബന്ധിതമാവുകയായിരുന്നു.
ഫാമിലി ഫാം ടാക്‌സില്‍ ബാക്ക്‌ബെഞ്ചേഴ്‌സിന്റെ സമ്മര്‍ദത്തിന് വഴങ്ങിയാണ് പ്രധാനമന്ത്രിയും, ചാന്‍സലറും തിരുത്തല്‍ വരുത്തിയത്. കര്‍ഷകര്‍ ഇന്‍ഹെറിറ്റന്‍സ് ടാക്‌സ് നല്‍കിത്തുടങ്ങുന്ന പരിധി 2.5 മില്ല്യണ്‍ പൗണ്ടിലേക്കാണ് വര്‍ധിപ്പിച്ചതോടെ പദ്ധതി ബാധിക്കുന്ന എസ്റ്റേറ്റുകളുടെ എണ്ണം പകുതിയായി താഴ്ന്നു.
ഇക്കഴിഞ്ഞ മാസങ്ങളില്‍ വിന്റര്‍ ഫ്യൂവല്‍ അലവന്‍സ്, വെല്‍ഫെയര്‍ പരിഷ്‌കാരങ്ങള്‍, 2 ചൈല്‍ഡ് ബെനഫിറ്റ് ക്യാപ്പ് എന്നിങ്ങനെ പല പ്രഖ്യാപനങ്ങളിലും സര്‍ക്കാര്‍ പിന്നോക്കം പോയിരുന്നു.
ഫാം ടാക്‌സ് സംബന്ധിച്ച നയം വോട്ടിനിട്ടപ്പോള്‍ 30 ലേബര്‍ എംപിമാര്‍ വിട്ടുനില്‍ക്കുകയും, ഒരാള്‍ എതിര്‍ക്കുകയും ചെയ്തിരുന്നു. ഇതോടെയാണ് നയത്തില്‍ ഇളവ് പ്രഖ്യാപിക്കുന്നത്. ഈ പിന്‍മാറ്റം സ്വാഗതം ചെയ്യുന്നതായി നാഷണല്‍ ഫാര്‍മേഴ്‌സ് യൂണിയന്‍ വ്യക്തമാക്കി.
