ട്രെയിന് യാത്രയ്ക്കിടയില് സിപിഎം കേന്ദ്ര കമ്മറ്റി അംഗവും മുന് മന്ത്രിയുമായ പി കെ ശ്രീമതിയുടെ ബാഗ് കവര്ന്നു. സമസ്തി പൂരില് മഹിളാ അസോസിയേഷന് സമ്മേളനം ഉദ്ഘാടനം ചെയ്യാന് പോകുമ്പോഴായിരുന്നു കവര്ച്ച. ബാഗില് ഉണ്ടായിരുന്ന പണവും സ്വര്ണാഭരണങ്ങളും മൊബൈല് ഫോണും രേഖകളും ഉള്പ്പെടെ നഷ്ടപ്പെട്ടു. വളരെ ഞെട്ടിപ്പിച്ച അനുഭവമായിരുന്നു ഉണ്ടായതെന്ന് പി കെ ശ്രീമതി പറഞ്ഞു.
മഹിളാ അസോസിയേഷന്റെ ബിഹാര് സംസ്ഥാന സമ്മേളനം ഉദ്ഘാടനം ചെയ്യാനാണ് പി കെ ശ്രീമതി കൊല്ക്കത്തയില് നിന്ന് സമസ്ത പൂരിലേക്ക് ട്രെയിന് യാത്ര നടത്തിയത്. ഇതിനിടയിലാണ് മോഷണം നടന്നത്. ബാഗിലുണ്ടായിരുന്ന സ്വര്ണാഭരണങ്ങളും 40,000 രൂപയും മൊബൈര് ഫോണും മറ്റ് രേഖകളുമാണ് നഷ്ടപ്പെട്ടത്.
ഉറങ്ങുമ്പോള് തലയ്ക്കടുത്തായാണ് ബാഗ് വെച്ചിരുന്നതെന്ന് പി കെ ശ്രീമതി പറഞ്ഞു. എഴുന്നേറ്റ് നോക്കിയപ്പോള് ബാഗ് നഷ്ടപ്പെട്ടിരുന്നു. ആ ബോഗിയില് യാത്ര ചെയ്തിരുന്ന മറ്റു ചിലരുടെ പേഴ്സുകളും നഷ്ടപ്പെട്ടിരുന്നു. ചെയിന് വലിച്ചെങ്കിലും ആരെങ്കിലും വന്ന് നോക്കുകയോ ഇടപെടുകയോ ചെയ്തില്ല. ടിടിയെ നോക്കിയപ്പോഴും കണ്ടില്ല. പിന്നീട് ഒരു പൊലീസുകാരനോട് കാര്യങ്ങൾ പറഞ്ഞു.
എന്നാല് നിസ്സംഗതയോടെയാണ് പൊലീസുകാരന് പ്രതികരിച്ചത്. പിന്നീട് മുഖ്യമന്ത്രിയുടെ ഓഫീസുമായി ബന്ധപ്പെടുകയും ഡിജിപിയെ വിവരം അറിയിക്കുകയുമായിരുന്നു. തുടര്ന്ന് ഡിജിപി ഉള്പ്പെടെയുള്ളവര് ഇടപെട്ടു. ട്രെയിന് ഇറങ്ങിയതിന് ശേഷം പരാതി നല്കി എന്നും പി കെ ശ്രീമതി പറഞ്ഞു.
