സ്റ്റോക്ക് ഓണ്‍ ട്രെന്റില്‍ അന്തരിച്ച അങ്കമാലി സ്വദേശി റിജോ പോളിന് വിട നല്‍കാന്‍ ഒരുങ്ങി മലയാളി സമൂഹം. ഈമാസം എട്ടിന് വ്യാഴാഴ്ച സ്റ്റോക്കിലെ ബര്‍സലേം പള്ളിയില്‍ രാവിലെ 11 മണിക്ക് റിജോയുടെ ആത്മശാന്തിക്കായി വി. കുര്‍ബാനയും ഒപ്പീസും തുടര്‍ന്ന് 12 മണി മുതല്‍ പൊതുദര്‍ശനവും നടത്തുന്നതായിരിക്കും. അന്നേദിസവം രാവിലെ പത്തരയോടെ ബര്‍സലേം സെന്റ്. ജോസഫ്‌സ് കത്തോലിക്കാ ദേവാലയത്തില്‍ എത്തിക്കുന്ന മൃതദേഹത്തില്‍ ഉച്ചക്ക് ഒരുമണി വരെ അന്തിമോപചാരം അര്‍പ്പിക്കാനുള്ള സൗകര്യം ഉണ്ടായിരിക്കും.
പതിനൊന്നു മണിക്ക് ഇടവക വികാരി ഫാ. ജോര്‍ജ് എട്ടുപറയില്‍ റിജോയുടെ ആത്മശാന്തിക്കായി വിശുദ്ധ കുര്‍ബാനയും ഒപ്പീസും അര്‍പ്പിക്കും. പിന്നീട് പൊതുദര്‍ശനത്തിനും പ്രാര്‍ത്ഥനകള്‍ക്കും ശേഷം ഫ്യൂണറല്‍ ഡയറക്ടേഴ്‌സിനു കൈമാറുന്ന മൃതദേഹം എംബസി നടപടികള്‍ പൂര്‍ത്തിയാകുന്നതനുസരിച്ച് സംസ്‌കാര ചടങ്ങുകള്‍ക്കായി നാട്ടിലേക്കു കൊണ്ടുപോകുന്നതാണ്. റിജോയുടെ ഭാര്യ റാണിയും മക്കളും റിജോയോടൊപ്പം നാട്ടിലേക്കു തിരികെ മടങ്ങും.
പൊതുദര്‍ശനം നടക്കുന്ന ദേവാലയത്തിന്റെ വിലാസം
St Joseph's Church, Hall Street, Stoke-on-Trent, Staffordshire ST6 4BB
