പലിശനിരക്ക് ഏറ്റവും കുറഞ്ഞ മോര്ട്ട്ഗേജ് ഡീലുകള് ഈ മാസം അവസാനിക്കുന്നതോടെ ഏകദേശം എഴുപതിനായിരത്തോളം കുടുംബങ്ങളുടെ മോര്ട്ട്ഗേജ് തിരിച്ചടവില് ആയിരക്കണക്കിന് പൗണ്ടിന്റെ വര്ദ്ധനയുണ്ടാകും. കോവിഡ് - 19 പ്രതിസന്ധിയില് തീരെ കുറഞ്ഞ നിരക്കിലുള്ള അഞ്ച് വര്ഷത്തെ ഫിക്സ്ഡ് ഡീലുകള് കരസ്ഥമാക്കിയവര്ക്ക് അവരുടെ അഞ്ച് വര്ഷക്കാലാവധി അവസാനിക്കുന്നതോടെ ഉയര്ന്ന നിരക്കിലുള്ള ഡീലുകളിലേക്ക് മാറേണ്ടതായി വരും. ഇത് പല കുടുംബങ്ങളിലും കടുത്ത സാമ്പത്തിക പ്രതിസന്ധിക്ക് വഴി തെളിക്കും എന്നാണ് കരുതപ്പെടുന്നത്.
ഈ വര്ഷം ഏകദേശം 18 ലക്ഷം ആളുകള്ക്ക് മോര്ട്ട്ഗേജ് പുതുക്കേണ്ടി വരും എന്നാണ് യുകെ ഫിനാന്സ് പറയുന്നത്. അഞ്ച് വര്ഷത്തെ ഫിക്സ്ഡ് ഡീലുകള് ഉണ്ടായിരുന്നവര്ക്കായിരിക്കും ബാധ്യത ഏറ്റവും അധികം അനുഭവപ്പെടുക. മണിസേവിംഗ്സ് ടൂള്, നൗസിന്റെ കണക്കുകള് പ്രകാരം ഈ മാസം 69,000 കുടുംബങ്ങളാണ് ഇത്തരത്തിലുള്ളത്. 2021 ജനുവരിയില് രണ്ടു ശതമാനം പലിശയ്ക്ക് അഞ്ച് വര്ഷത്തെ ഫിക്സ്ഡ് ഡീല് എടുത്തവര്ക്ക് ഈ മാസം അത് പുതുക്കേണ്ടി വരികയാണ്. റീമോര്ട്ട്ഗേജ് ചെയ്യുമ്പോള് ശരാശരി 4.9 ശതമാനം വരെ ഇവര് നല്കേണ്ടതായി വരും എന്നാണ് കണക്കാക്കുന്നത്.
