മലപ്പുറത്തെ 14കാരിയുടെ കൊലപാതകം, കുറ്റം സമ്മതിച്ച് പതിനാറുകാരന്; ബലാത്സംഗം നടന്നതായും മൊഴി
മലപ്പുറത്തെ 14കാരിയുടെ കൊലപാതകത്തില് കുറ്റം സമ്മതിച്ച് പതിനാറുകാരന്. കഴുത്ത് ഞെരിച്ചാണ് പെണ്കുട്ടിയെ കൊലപ്പെടുത്തിയതെന്ന് പെണ്കുട്ടിയുടെ സുഹൃത്ത് കൂടിയായ പ്രതി പറഞ്ഞു. ബലാത്സംഗം നടന്നതായും പതിനാറുകാരന് മൊഴി നല്കിയിട്ടുണ്ട്. ഇന്നലെ സ്കൂള് വിട്ട ശേഷം കാണാതായ പെണ്കുട്ടിയെ ഇന്ന് മരിച്ച നിലയില് കണ്ടെത്തുകയായിരുന്നു. കസ്റ്റഡിയിലെടുത്തപ്പോള് പ്രതി തന്നെയാണ് മൃതദേഹം കാണിച്ചു കൊടുത്തത്.
വാണിയമ്പലത്തിനും തൊടിയപുലത്തിനും ഇടയില് റെയില്വേ ട്രാക്കിനോട് ചേര്ന്നുള്ള കുറ്റിക്കാട്ടിലാണ് ഒമ്പതാം ക്ലാസ് വിദ്യാര്ത്ഥിനിയായ പെണ്കുട്ടിയുടെ മൃതദേഹം കണ്ടെത്തിയത്. ഇന്നലെ സ്കൂളിലേക്ക് പോയ പെണ്കുട്ടി വീട്ടില് തിരിച്ചെത്തിയിരുന്നില്ല. ഇന്നലെ രാവിലെ 9.30ന് കുട്ടി കരുവാരകുണ്ട് സ്കൂള് പടിയില് ബസിറങ്ങി. പിന്നീട് കുട്ടിയെ ആരും കണ്ടിട്ടില്ല.
പെണ്കുട്ടിയെ കാണാതായതിനെ തുടര്ന്ന് പെണ്കുട്ടിയുടെ അമ്മ പൊലീസില് പരാതി നല്കുകയായിരുന്നു. പ്രാഥമിക അന്വേഷണത്തില് പെണ്കുട്ടിക്ക് ആണ്സുഹൃത്ത് ഉണ്ടെന്ന് പൊലീസ് കണ്ടെത്തി. സംഭവത്തില് പ്ലസ് വണ് വിദ്യാര്ത്ഥിയെയാണ് പൊലീസ് കസ്റ്റഡിയിലെത്തത്. പുള്ളിപ്പാടത്ത് കുറ്റിക്കാട്ടിലാണ് പെണ്കുട്ടിയുടെ മൃതദേഹം കണ്ടെത്തിയത്. കൈകള് കൂട്ടിക്കെട്ടിയ നിലയിലായിരുന്നു. സ്കൂള് യൂണിഫോമിലായിരുന്നു കുട്ടിയുടെ മൃതദേഹം.
