മൂന്ന് അപ്പോയിന്റ്‌മെന്റിന് ശേഷവും രോഗിയുടെ രോഗാവസ്ഥ തിരിച്ചറിയാന്‍ കഴിഞ്ഞില്ലെങ്കില്‍ മറ്റൊരു ഡോക്ടറുടെ സഹായം തേടാന്‍ വഴിയൊരുക്കുന്ന പുതിയ സിസ്റ്റം നിലവില്‍ വന്നു. 'ജെസ് റൂള്‍' എന്നറിയപ്പെടുന്ന നിയമം ഈയാഴ്ച ഇംഗ്ലണ്ടിലെ എല്ലാ ജിപി പ്രാക്ടീസുകളിലും പരസ്യപ്പെടുത്തും.
20 തവണ സര്‍ജറിയെ ബന്ധപ്പെട്ട ശേഷം 2020-ല്‍ മരിച്ച 27-കാരി ജെസീക്കാ ബ്രാഡിയുടെ പേരിലാണ് നിയമം. സെപ്റ്റംബറില്‍ പ്രാബല്യത്തിലെത്തിയ നിയമം വഴി, ഒഴിവാക്കാവുന്ന മരണങ്ങള്‍ തടയുകയും, കാന്‍സര്‍ പോലുള്ള ഗുരുതര രോഗങ്ങള്‍ കണ്ണില്‍ പെടാതെ പോകുന്നത് ഒഴിവാക്കാനുമാണ് ശ്രമിക്കുന്നത്.
പുതിയ നിയമം അനുസരിച്ച് ഡോക്ടര്‍മാരോട് രണ്ടാമതൊരു അഭിപ്രായം തേടാനും, രോഗികളെ നേരില്‍ കണ്ട് പരിശോധന നടത്താനും, കൂടുതല്‍ ടെസ്റ്റുകള്‍ നല്‍കാനുമാണ് ആവശ്യപ്പെടുന്നത്. ഇംഗ്ലണ്ടിലെ 6170 ജിപി പ്രാക്ടീസുകളിലും ഇത് സംബന്ധിച്ച പോസ്റ്ററുകള്‍ പതിപ്പിക്കും. പ്രാഥമിക ചിന്തകള്‍ മാറ്റിവെച്ച് രോഗികളുടെ സുരക്ഷയ്ക്ക് കൂടുതല്‍ ഉത്തരവാദിത്വം കാണിക്കാന്‍ പദ്ധതി ഫാമിലി ഡോക്ടര്‍മാരെ പ്രേരിപ്പിക്കുമെന്ന് ഹെല്‍ത്ത് & സോഷ്യല്‍ കെയര്‍ ഡിപ്പാര്‍ട്ട്‌മെന്റ് പറയുന്നു.
എയര്‍ബസില്‍ എഞ്ചിനീയറായിരുന്ന ബ്രാഡി ആറ് മാസക്കാലമാണ് തന്റെ വയറുവേദനയും, ശര്‍ദ്ദിലും, ചുമയും, ഭാരം കുറയുന്നതുമായി ബന്ധപ്പെട്ട് ജിപി സര്‍ജറിയെ ബന്ധപ്പെട്ടത്. കൊവിഡ് കാലമായതിനാല്‍ ലോംഗ് കൊവിഡ് ലക്ഷണമാണെന്ന പേരില്‍ ചെറുതാക്കി കാണിച്ച അവസ്ഥ കാന്‍സറാണെന്ന് തിരിച്ചറിയുമ്പോഴേക്കും ഏറെ വൈകിയിരുന്നു. ഒരു ഡോക്ടറെ പ്രൈവറ്റായി പണം നല്‍കി കണ്ടതിന് ശേഷമായിരുന്നു ഇത്. എന്നാല്‍ മൂന്നാഴ്ച കഴിയുമ്പോള്‍ ബ്രാഡി ആശുപത്രിയില്‍ മരണമടഞ്ഞു.
