മഹാരാഷ്ട്ര ഉപമുഖ്യമന്ത്രിയും എന്സിപി നേതാവുമായ അജിത് പവാര്(66) വിമാനപകടത്തില് കൊല്ലപ്പെട്ടു . മഹാരാഷ്ട്രയിലെ ബരാമതിയില് വിമാനം തകര്ന്നു വീണുണ്ടായ അപകടത്തിലാണ് അന്ത്യം. ഡിജിസിഎ മരണം സ്ഥിരീകരിച്ചു. അജിത് പവാറിനെ ഗുരുതര പരുക്കുകളോടെയായിരുന്നു ആശുപത്രിയില് പ്രവേശിപ്പിച്ചത്.
ഇന്ന് രാവിലെ 8.49 ഓടെയാണ് മുംബൈയില് നിന്നും മഹാരാഷ്ട്രയിലെ ബരാമതിയിലേക്ക് പവാറും അനുയായികളും സ്വകാര്യവിമാനത്തില് യാത്ര ചെയ്തത്. അപകടത്തില് പെട്ടതോടെ വിമാനം പൂര്ണ്ണമായും കത്തിനശിച്ചു. അജിത് പവാറിനൊപ്പം വിമാനത്തിലുണ്ടായിരുന്ന 5 പേര്ക്കും ജീവന് നഷ്ടപ്പെട്ടതായി വാര്ത്താ ഏജന്സിയായ പിടിഐ റിപ്പോര്ട്ട് ചെയ്യുന്നു.
അജിത് പവാര് ബാരാമതിയില് ഒരു റാലിയില് പങ്കെടുക്കാന് എത്തിയതായിരുന്നു. എത്തുന്നതിന് 25 മിനിറ്റ് മുമ്പാണ് അപകടം നടന്നത്. പോലീസും ജില്ലാ ഭരണകൂടവും സംഭവസ്ഥലത്തെത്തി. വിമാനം ലാന്ഡിംഗിനിടെ വയലില് ഇടിച്ചു ഇറങ്ങുകയായിരുന്നു. വിമാനം ലാന്ഡിങ് ചെയ്യുന്നതിനിടെ സാങ്കേതിക തകരാര് നേരിട്ടു. തുടര്ന്ന് പൈലറ്റ് ക്രാഷ് ലാന്ഡിങിന് ശ്രമിക്കുന്നതിനിടെ വയലില് ഇടിച്ചിറങ്ങുകയായിരുന്നു. വിമാനം കത്തി വീഴുകയായിരുന്നുവെന്ന് ദൃക്സാക്ഷികള് പറയുന്നത്. ഉടന് തന്നെ രക്ഷാപ്രവര്ത്തനം ആരംഭിച്ചെങ്കിലും ആരുടെയും ജീവന് രക്ഷിക്കാന് കഴിഞ്ഞില്ല.
2024 ഡിസംബര് 5 മുതല് മഹാരാഷ്ട്ര ഉപ മുഖ്യമന്ത്രിയായി തുടരുന്ന മുതിര്ന്ന എന്സിപി നേതാവാണ് അജിത് പവാര്. എട്ട് തവണ നിയമസഭാംഗമായി. അഞ്ച് തവണ ഉപ മുഖ്യമന്ത്രി, അഞ്ച് തവണ സംസ്ഥാന കാബിനറ്റ് വകുപ്പ് മന്ത്രി, ഒരു തവണ ലോക്സഭാംഗം എന്നീ നിലകളിലും പ്രവര്ത്തിച്ചിട്ടുണ്ട്.
മുതിര്ന്ന എന്സിപി നേതാവായ ശരദ് പവാറിന്റെ ജ്യേഷ്ഠ സഹോദരനായ അനന്തറാവുവിന്റെയും ആശാതായിയുടെയും മകനായി മഹാരാഷ്ട്രയിലെ പൂനൈ ജില്ലയിലെ ബരാമതിയില്1959 ജൂലൈ 22നാണ് ജനനം.
1991ലെ മഹാരാഷ്ട്ര നിയമസഭ തിരഞ്ഞെടുപ്പില് ബരാമതിയില് നിന്ന് ആദ്യമായി നിയമസഭാംഗമായ അജിത് പിന്നീട് നടന്ന എല്ലാ നിയമസഭ തിരഞ്ഞെടുപ്പുകളിലും ബരാമതിയില് നിന്ന് തെരഞ്ഞെടുക്കപ്പെട്ടു. 1991-ലെ സുധാകരറാവു നായിക് മന്ത്രിസഭയില് ആദ്യമായി സംസ്ഥാന കൃഷി വകുപ്പ് മന്ത്രിയായ അജിത് പിന്നീട് അഞ്ച് തവണ കൂടി കാബിനറ്റ് മന്ത്രിയായി.
2010ലെ അശോക് ചവാന് മന്ത്രിസഭയില് ആദ്യമായി ഉപ മുഖ്യമന്ത്രിയായി തെരഞ്ഞെടുക്കപ്പെട്ടു. പിന്നീട് പൃഥ്വിരാജ് ചവാന്, ദേവേന്ദ്ര ഫഡ്നാവീസ്, ഉദ്ധവ് താക്കറെ, ഏകനാഥ് ഷിന്ഡേ മന്ത്രിസഭകളില് വീണ്ടും ഉപ മുഖ്യമന്ത്രിയായി.
