സ്‌കൂള്‍ പ്രവൃത്തി ദിനങ്ങളില്‍ ക്ലാസ് കട്ട് ചെയ്ത് കുട്ടികളെ യാത്ര കൊണ്ടുപോകുന്ന മാതാപിതാക്കള്‍ ഇനി ജാഗ്രത പാലിക്കണം. രക്ഷിതാക്കള്‍ക്കു ചുമത്തുന്ന പിഴയുടെ എണ്ണം റെക്കോര്‍ഡ് ഉയരത്തിലെത്തി. വിദ്യാഭ്യാസ വകുപ്പ് പുറത്തുവിട്ട പുതിയ കണക്കു പ്രകാരം കഴിഞ്ഞ വര്‍ഷം മാത്രം 459288 ഫൈനുകളാണ് ടേം ടൈം അവധി എടുത്തതിന്റെ പേരില്‍ ചുമത്തിയത്. മുന്‍ വര്‍ഷത്തേക്കാള്‍ നാലു ശതമാനം വര്‍ധനയാണ് രേഖപ്പെടുത്തിയിരിക്കുന്നത്.
അനുമതിയില്ലാതെ സ്‌കൂളില്‍ വരാതിരുന്നതിന് ചുമത്തിയ ഫൈനുകളില്‍ 93 ശതമാനവും ഇത്തരം അവധികളുമായി ബന്ധപ്പെട്ടവയാണ്. 2024 ല്‍ വന്ന നിയമ ഭേദഗതിയാണ് ഇതിന് കാരണം. മുമ്പ് 60 പൗണ്ടായിരുന്ന പിഴ പുതിയ ചട്ട പ്രകാരം ഓരോ കുട്ടിയ്ക്കും 80 പൗണ്ടാക്കി ഉയര്‍ത്തി.
സ്‌കൂള്‍ ദിനങ്ങളില്‍ കുട്ടികള്‍ മുടങ്ങുന്നത് തടയാനാണ് നടപടിയെന്ന് വിദ്യാഭ്യാസ വകുപ്പ് വ്യക്തമാക്കി. സ്‌കൂള്‍ സമയത്ത് നീണ്ട അവധികളെടുക്കുന്നത് പഠനത്തെ ബാധിക്കും. നാട്ടിലേക്ക് യാത്ര പോകുന്ന മലയാളി കുടുംബങ്ങളിലെ കുട്ടികളുടെ സ്‌കൂള്‍ ദിനങ്ങള്‍ കുറയാറുണ്ട്. ഇതു പലപ്പോഴും ഫൈന്‍ അടയ്‌ക്കേണ്ട അവസ്ഥയിലെത്തിക്കും. അതുകൊണ്ടു ഇനി മുതല്‍ സ്‌കൂള്‍ പ്രവര്‍ത്തി ദിനങ്ങള്‍ അവധിയെടുപ്പിക്കാന്‍ മാതാപിതാക്കള്‍ രണ്ടുവട്ടം ആലോചിക്കും.
