ഹിറ്റ്‌ കൂട്ടുകെട്ടായ മമ്മൂട്ടിയും അന്‍വര്‍ റഷീദും നീണ്ട ഇടവേളയ്ക്കു ശേഷം ഒരുമിക്കുന്നു. ഇന്‍ഡസ്ട്രി ഹിറ്റായ രാജമാണിക്യത്തിനും ബ്ലോക്ക്ബസ്റ്ററായ അണ്ണന്‍ തമ്പിക്കും ശേഷം മമ്മൂട്ടിയും അന്‍വറും ഒന്നിക്കുന്ന ചിത്രത്തിന് രചന നിര്‍വ്വഹിക്കുന്നത് ബെന്നി.പി.നായരമ്പലമായിരിക്കും. ക്യൂബ്സ് എന്റര്‍ടെയ്ന്‍മെന്റ്സിന്റെ ബാനറില്‍ ഷരീഫ് മുഹമ്മദ് ആണ് നി‌ര്‍മ്മാണം.
അണ്ണന്‍ തമ്പി, തൊമ്മനും മക്കളും, ചട്ടമ്പിനാട് തുടങ്ങി നിരവധി മമ്മൂട്ടിച്ചിത്രങ്ങള്‍ക്ക് തിരക്കഥയൊരുക്കിയ ബെന്നി ഏറെക്കാലത്തിന് ശേഷം രചനാ വഴിയിലേക്ക് തിരിച്ചെത്തുന്ന ചിത്രം കളര്‍ഫുള്‍ എന്റര്‍ടെയ്നറായിരിക്കുമെന്നാണ് വിവരം.
ചിത്രത്തിന്റെ ഔദ്യോഗിക പ്രഖ്യാപനം വരും ദിവസങ്ങളിലുണ്ടാകും. നേരത്തേ ക്യൂബ്സിന്റെ മമ്മൂട്ടിച്ചിത്രം സംവിധാനം ചെയ്യാനിരുന്നത് ഖാലിദ് റഹ്മാനായിരുന്നു. നിര്‍മ്മാതാവുമായുള്ള അഭിപ്രായ വ്യത്യാസത്തെ തുടര്‍ന്ന് ഖാലിദ് റഹ്മാന്‍ പിന്‍മാറി. ചിത്രം ഈ വര്‍ഷം അവസാനം ആയിരിക്കും ആരംഭിക്കുക.
