കൊല്ലം: മുന് മുഖ്യമന്ത്രി ഉമ്മന്ചാണ്ടിയെ ലൈംഗികാതിക്രമ കേസില് കുടുക്കുമെന്ന് കെ ബി ഗണേഷ്കുമാര് പറഞ്ഞിരുന്നതായി മൊഴി. ഗണേഷ്കുമാറിന്റെ മുന് പേഴ്സണല് സ്റ്റാഫ് അംഗം സുധീര് മലയിലാണ് കഴിഞ്ഞ ദിവസം കൊട്ടാരക്കര ജുഡീഷ്യല് ഫസ്റ്റ്ക്ലാസ് മജിസ്ട്രേറ്റ് കോടതിയില് മൊഴി നല്കിയത്. 2011 മുതല് 2013 വരെ ഗണേഷ്കുമാറിന്റെ പേഴ്സണല് സ്റ്റാഫ് ആയിരുന്നു സുധീര് മലയില്.
സോളാര് കേസുമായി ബന്ധപ്പെട്ട ഗൂഢാലോചനക്കേസിലെ സാക്ഷിയാണ് സുധീര്. ഉമ്മന്ചാണ്ടിയെ അപകീര്ത്തിപ്പെടുത്താന് സോളാര് കേസ് പ്രതിയുടെ കത്തില് ഗൂഢാലോചന നടത്തി നാലുപേജ് അധികമായി കൂട്ടിച്ചേര്ത്തു എന്നാണ് കേസ്. സുധീര് ഈ കേസിലെ നാലാം സാക്ഷിയാണ്. ഗണേഷ്കുമാര് പരാതിക്കാരിയുമായി അടുത്ത ബന്ധം പുലര്ത്തിയിരുന്നെന്നും മന്ത്രിയുടെ ഔദ്യോഗിക വസതികളിലും ഓഫീസുകളിലും നിത്യ സന്ദര്ശകയായിരുന്നുവെന്നും സുധീറിന്റെ മൊഴിയിലുണ്ട്.
മന്ത്രിസ്ഥാനം തിരികെ നല്കാത്തതിന്റെ പകയിലാണ് ഗണേഷ്കുമാര് ഇത്തരത്തില് പറഞ്ഞത് എന്നും സുധീര് പറഞ്ഞു. ഉമ്മന്ചാണ്ടി മന്ത്രിസഭയില് മന്ത്രിയായിരുന്ന ഗണേഷ്കുമാറിന് ഭാര്യ നല്കിയ ഗാര്ഹിക പീഡന പരാതിയിന്മേല് രാജിവെക്കേണ്ടിവന്നിരുന്നു. 2013 ഏപ്രില് രണ്ടിനാണ് ഗണേഷ്കുമാര് രാജിവെച്ചത്.
കേസ് ഒത്തുതീര്ന്നതിന് പിന്നാലെ ഗണേഷ്കുമാര് പലതവണ മന്ത്രിസ്ഥാനം തിരികെ ആവശ്യപ്പെട്ട് ഉമ്മന്ചാണ്ടിയെ കണ്ടിരുന്നുവെങ്കിലും നടന്നില്ല. ഇതിന് പിന്നാലെ ഉമ്മന്ചാണ്ടിയെ ഒരു പാഠം പഠിപ്പിക്കുമെന്നും അദ്ദേഹത്തെയും യുഡിഎഫ് നേതാക്കളെയും ലൈംഗികാതിക്രമ കേസില് കുടുക്കുമെന്നും ഗണേഷ് പറഞ്ഞുവെന്ന് സുധീര് പറയുന്നു. തന്നോടും മറ്റ് പല ജീവനക്കാരോടും ഗണേഷ്കുമാര് ഇത്തരത്തില് പറഞ്ഞിരുന്നതായും സുധീര് പറഞ്ഞു.
സോളാര് കമ്മീഷന് റിപ്പോര്ട്ടില് ഉമ്മന്ചാണ്ടിയുടെ പേര് ഉള്പ്പെട്ടെന്നറിഞ്ഞപ്പോഴാണ് ഗൂഢാലോചന മനസിലായതിനും സുധീര് മൊഴി നല്കി.
