തുടര്‍ച്ചയായി പെയ്യുന്ന മഴയില്‍ വലഞ്ഞ് ഇംഗ്ലണ്ടിലെ ജനത. ഇംഗ്ലണ്ടില്‍ 97 വെള്ളപ്പൊക്ക മുന്നറിയിപ്പുകളും 217 ഫ്‌ളഡ് അലര്‍ട്ടുകളും പുറപ്പെടുവിച്ചതായി അധികൃതര്‍ അറിയിച്ചു. ദക്ഷിണ പടിഞ്ഞാറന്‍ മേഖലകളിലും മിഡ്‌ലാന്‍ഡ്‌സിലുമാണ് ജനം കൂടുതല്‍ ദുരിതം അനുഭവിക്കുന്നത്. സ്‌കോട്‌ലന്‍ഡില്‍ ഏഴ് മുന്നറിയിപ്പുകളും രണ്ട് അലര്‍ട്ടുകളും നിലനില്‍ക്കുമ്പോള്‍ വെയില്‍സില്‍ ഇതുവരെ മുന്നറിയിപ്പില്ല.
അടുത്ത ആഴ്ചയിലും മഴ തുടരുമെന്ന സൂചനയെ തുടര്‍ന്ന് ദക്ഷിണ പടിഞ്ഞാറന്‍ ഇംഗ്ലണ്ടും ദക്ഷിണ വെയില്‍സും ഉള്‍പ്പെടുത്തി തിങ്കളാഴ്ച മെറ്റ് ഓഫീസ് യെല്ലോ അലര്‍ട്ട് പ്രഖ്യാപിച്ചിട്ടുണ്ട്. വെള്ളത്തിലൂടെ വാഹനമോടിക്കരുതെന്ന് അധികൃതര്‍ ജനങ്ങള്‍ക്ക് ശക്തമായ മുന്നറിയിപ്പു നല്‍കി.
ഡെവണ്‍, ഹാംപ്ഷയര്‍, ഗ്ലോസ്റ്റര്‍ വുസ്റ്റര്‍ മേഖലകളില്‍ മുന്നറിയിപ്പുകള്‍ നല്‍കിയിരിക്കുന്നത്. വാര്‍വിക്ഷയര്‍ ഫയര്‍ ആന്‍ഡ് റെസ്‌ക്യു സര്‍വീസ് റിവര്‍ ഡീന്‍ നദിയിലെ ജലനിരപ്പ് അപകടകരമായി ഉയര്‍ന്നതായി അറിയിച്ചു. നോര്‍ത്ത് അയര്‍ലന്‍ഡില്‍ കഴിഞ്ഞ 149 വര്‍ഷത്തിനിടയിലെ ഏറ്റവും മഴയേറിയ ജനുവരിയായിരുന്നു ഇത്തവണത്തേത്. ഫെബ്രുവരിയിലും ശക്തമായ മഴ തുടരുകയാണ്. ഈ മാസം ആദ്യ അഞ്ചു ദിവസത്തിനുള്ളില്‍ തന്നെ ചില മേഖലകളില്‍ സാധാരണ ഒരു മാസത്തില്‍ ലഭിക്കേണ്ടതിലധികം മഴ രേഖപ്പെടുത്തിയതായി മെറ്റ് ഓഫീസ് അറിയിച്ചു.
