സാമൂഹ്യ സുരക്ഷാ കോണ്ട്രിബ്യൂഷന് വിഷയങ്ങളില് ഇന്ത്യ യു കെയുമായി പുതിയ കരാറില് ഒപ്പുവച്ചു. ഇന്ത്യന് വിദേശകാര്യ സെക്രട്ടറി വിക്രം മിസ്രിയും ഇന്ത്യയിലെ ബ്രിട്ടീഷ് കമ്മീഷണര് ലിന്ഡി കാമറൂണുമാണ് കരാറില് ഒപ്പിട്ടത്. ന്യൂഡല്ഹിയില് വെച്ച് കഴിഞ്ഞ ചൊവ്വാഴ്ച്ചയായിരുന്നു കരാറില് ഒപ്പിട്ടത്.
പുതിയ കരാറനുസരിച്ച് ഇരു രാജ്യങ്ങളിലെയും പൗരന്മാര്ക്ക് ഇരട്ട സാമൂഹ്യ സുരക്ഷാ കോണ്ട്രിബ്യൂഷന് നല്കേണ്ടതായി വരില്ല. അതായത്, താത്ക്കാലികാടിസ്ഥാനത്തില് ഇംഗ്ലണ്ടിലോ നോര്ത്തേണ് അയര്ലന്ഡിലോ ജോലിക്ക് പോകുന്ന ഇന്ത്യാക്കാര്ക്ക് അവിടെ നാഷണല് ഇന്ഷുറന്സ് വിഹിതം നല്കേണ്ടി വരില്ല.
മൂന്ന് വര്ഷം വരെ ജോലി ചെയ്യുന്നവര്ക്കാണ് ഈ ഇളവ് ലഭിക്കുക. ഈ കരാര് ഇന്ത്യയും ബ്രിട്ടനും തമ്മിലുള്ള ബൃഹത്തായ സ്വതന്ത്ര വ്യാപാര കരാറിന്റെ ഭാഗമാണെന്നും, വ്യാപാര കരാര് പ്രാബല്യത്തില് വരുന്നതോടെ ഈ കരാറും പ്രാബല്യത്തില് വരുമെന്നും വിദേശകാര്യ മന്ത്രാലയം അറിയിച്ചിട്ടുണ്ട്.
