എഡിന്‍ബറോ നഗരത്തില്‍ രണ്ട് കൈകളിലും കത്തിയുമായി അക്രമം നടത്തിയ ആളെ പോലീസ് കീഴടക്കി. ഏഴ് മണിക്കൂര്‍ നീണ്ട ശ്രമത്തിനൊടുവിലാണ് അക്രമിയെ പിടികൂടിയത്. ഇയാളുടെ കുത്തേറ്റ രണ്ടുപേരെ ഉടനടി ആശുപത്രിയില്‍ പ്രവേശിപ്പിച്ചിട്ടുണ്ട്. കൃത്യത്തിന് ശേഷം പടിഞ്ഞാറന്‍ എഡിന്‍ബര്‍ഗിലെ കാല്‍ഡറിനുള്ള ഒരു അപ്പാര്‍ട്ട്‌മെന്റന്റെ പതിനൊന്നാം നിലയിലേക്ക് ഓടികയറിയ അക്രമി അവിടെ നിന്നുമായിരുന്നു പോലീസിനെ വെല്ലുവിളിച്ചത്. പോലീസ് പിടികൂടാന്‍ ശ്രമിക്കുന്നതിനു മുന്‍പായി ഇയാള്‍ ഒരു സ്‌കൂളിലേക്കും ഒരു നഴ്‌സറിയിലേക്കും കടക്കാന്‍ ശ്രമിച്ചതായും പ്രദേശവാസികള്‍ പറയുന്നു.
ശരീരം മുഴുവന്‍ ചോരയുമായാണ് അയാള്‍ എത്തിയതെന്നും അവര്‍ പറയുന്നു. ഒന്നിലധികം പേരെ കുത്തിയ ഇയാള്‍ പ്രദേശത്തെ ഒരു കടയിലും കയറി ആക്രമണം നടത്തി. തിങ്കളാഴ്ച്ച രാവിലെ എട്ടരയോടെ ഇയാള്‍ ഇരുകൈകളിലും ഓരോ കത്തിയുമായി എഡിന്‍ബര്‍ഗിലെ തെരുവുകളിലൂടെ നടക്കുന്ന ദൃശ്യം സമൂഹമാധ്യമങ്ങളില്‍ പ്രചരിക്കുന്നുണ്ട്. കുത്തേറ്റവരെ റോയന്‍ ഇന്‍ഫേമറി ഓഫ് എഡിന്‍ബര്‍ഗിലേക്കാണ് ചികിത്സയ്ക്കായി കൊണ്ടുപൊയിട്ടുള്ളത്.
ഇയാള്‍ പ്രദേശത്തെ ഒരു കടയില്‍ കയറി അക്രമം കാണിക്കുന്നതിന്റെയും കുപ്പികള്‍ തല്ലിത്തകര്‍ക്കുന്നതിന്റെയും പെട്ടികള്‍ നിലത്തേക്ക് വലിച്ചെറിയുന്നതിന്റെയുമൊക്കെ വീഡിയോ ദൃശ്യങ്ങളും പുറത്തു വന്നിട്ടുണ്ട്. തീവ്രവാദ പ്രവര്‍ത്തനങ്ങളുമായി ഇതിനു ബന്ധമില്ലെന്ന് പോലീസ് അറിയിച്ചിട്ടുണ്ട്.
