യുദ്ധം തുടര്ന്നാല് യുകെയുടെ സമ്പദ് വ്യവസ്ഥയ്ക്കും കനത്ത തിരിച്ചടിയാവും; ആശങ്കയില് ചാന്സലര്
യുദ്ധത്തില് നേരിട്ട് പങ്കെടുക്കുന്നില്ലെങ്കിലും മധ്യപൂര്വേഷ്യന് പ്രതിസന്ധി മൂലം യുകെയുടെ സമ്പദ് വ്യവസ്ഥയ്ക്കും കനത്ത ആഘാതം ഉണ്ടാകും എന്ന ആശങ്കയില് ചാന്സലര്. യുദ്ധം മൂലം എണ്ണ വില ഉരുകയാണ്. യുകെയില് സാമ്പത്തിക പ്രതിസന്ധി ഉയരാന് സാധ്യതയുണ്ടെന്നും സ്ഥിതിഗതികള് സൂക്ഷ്മമായി വിലയിരുത്തുകയാണെന്നും ചാന്സലര് റേച്ചല് റീവ്സ് പറഞ്ഞു. ഇതിനുപുറമേ ട്രംപിനോട് കീര് സ്റ്റാര്മര് സര്ക്കാര് നല്ല രീതിയില് സഹകരിച്ചില്ലെങ്കില് താരിഫ് പ്രതിസന്ധിയുമുണ്ടാകും. നിലവില് ഒരു വ്യാപാര പ്രതിസന്ധി താങ്ങാന് ബ്രിട്ടനാകില്ല.
നികുതി വര്ധിപ്പിച്ച് രാജ്യത്തിന്റെ സാമ്പത്തിക അടിത്തറ ഒരുക്കാനുള്ള റേച്ചല് റീവ്സിന്റെ ശ്രമത്തിന് വന് വിമര്ശനമാണ് ഉയരുന്നത്. എങ്കില് പോലും കടുത്ത നിലപാടുകളാണ് ബജറ്റില് കൊണ്ടുവന്നത്. ഇപ്പോഴിതാ പണപ്പെരുപ്പം കൂടുന്നതും തൊഴിലില്ലായ്മ വര്ധിക്കുന്നതുമെല്ലാം തിരിച്ചടിയാണ് സമ്മാനിക്കുന്നത്.
ചാന്സലര് കൊണ്ടുവന്ന നികുതി നയം സാധാരണക്കാരെ സമ്മര്ദ്ദത്തിലാക്കിയിരിക്കുകയാണ്. ഇതിനിടെ എണ്ണവില ഉയരുകയും സാധനങ്ങളുടെ വില വര്ധനവും എനര്ജി ബില്ല് ഉയരുന്നതുമൊന്നും ജനങ്ങള് ഉള്ക്കൊള്ളുകയുമില്ല. യുദ്ധം നീണ്ടുപോയാല് വീണ്ടും രാജ്യം പ്രതിസന്ധിയിലാകും. ക്ഷേമ പദ്ധതികള്ക്കും പെന്ഷനും ഉള്പ്പെടെ പണം കണ്ടെത്താന് സര്ക്കാര് പാടുപെടുകയാണ്. ഇറാന് വിഷയത്തില് അയവു വന്നില്ലെങ്കില് തിരിച്ചടിയാകുമെന്ന ആശങ്കയിലാണ് ചാന്സലര് .
എനര്ജി ബില്ലുകള് ഏപ്രില് മാസത്തോടെ കുറയുമെന്ന ശുഭപ്രതീക്ഷയിലായിരുന്നു ബ്രിട്ടന്. കൂടാതെ പണപ്പെരുപ്പവും താഴുന്നതിനാല് പലിശ നിരക്ക് കുറയാനുള്ള സാധ്യതയും തെളിഞ്ഞിരുന്നു. അങ്ങനെ മോര്ട്ടഗേജ് നിരക്കും കുറയുമെന്ന് കരുതി. എന്നാല് ഇറാനില് അമേരിക്കയും, ഇസ്രയേലും ചേര്ന്ന് അക്രമം നടത്തിയതോടെ സ്ഥിതി മാറി. പ്രതീക്ഷകളെല്ലാം സ്വപ്നങ്ങളായി അവശേഷിക്കുമെന്നാണ് ഇപ്പോഴത്തെ ആശങ്ക.
സൗദി അറേബ്യയിലെയും, ഖത്തറിലെയും ഇന്ധന പ്ലാന്റുകള്ക്ക് നേരെ ഇറാന് അക്രമം നടത്തിയതിനെ തുടര്ന്ന് ഇവ അടച്ചിട്ടത് പ്രതിസന്ധി രൂക്ഷമാക്കും. അതേസമയം ഇന്ധനവില ഉയര്ന്നാല് രാജ്യത്ത് പണപ്പെരുപ്പം വീണ്ടും ഉയരാന് ഇടയാക്കുമെന്നാണ് ആശങ്ക. ഇതോടെ പലിശ കുറയ്ക്കാനുള്ള നീക്കങ്ങള് ബാങ്ക് ഓഫ് ഇംഗ്ലണ്ട് മാറ്റിവെയ്ക്കുമെന്നും വിപണി സൂചിപ്പിക്കുന്നു.
