ഇന്ത്യയില് ആദ്യമായി ദയാവധത്തിന് അനുമതി നല്കി സുപ്രീംകോടതി. 13 വര്ഷമായി കൃത്രിമമായി ജീവന് നിലനിര്ത്തുന്ന ഹരീഷ് റാണയ്ക്ക് ഉപകരണങ്ങള് മാറ്റി സ്വാഭാവിക മരണം അനുവദിക്കും. വൃദ്ധ മാതാപിതാക്കളുടെ ഹര്ജിയിലാണ് കോടതി അനുമതി നല്കിയത്.
യന്ത്രസഹായത്തോടെ മാത്രം ജീവന് തുടരുന്നതില് അര്ത്ഥമില്ലെന്ന ഡോക്ടര്മാരുടെ അഭിപ്രായവും പരിഗണിച്ചു. ഹരീഷ് റാണെയ്ക്ക് നല്കി വരുന്ന വെന്റിലേറ്റര് സഹായം പിന്വലിക്കാമെന്നും ഘട്ടംഘട്ടമായി ചികിത്സ അവസാനിപ്പിക്കാമെന്നും സുപ്രീം കോടതി വ്യക്തമാക്കി.
2013-ല് കെട്ടിടത്തിന് മുകളില് നിന്ന് വീണ് ഗുരുതരമായി പരിക്കേറ്റ ഹരീഷിന്റെ ജീവന്, ജീവന്രക്ഷാ ഉപകരണങ്ങളുടെ സഹായത്തോടെയാണ് ഇതുവരെ നിലനിര്ത്തിയിരുന്നത്. മകന്റെ കഷ്ടപ്പാടുകള് അവസാനിപ്പിക്കണമെന്ന മാതാപിതാക്കളുടെ അപേക്ഷ പരിഗണിച്ച കോടതി, അന്തസ്സോടെ മരിക്കാനുള്ള അവകാശം വ്യക്തികള്ക്കുണ്ടെന്ന് നിരീക്ഷിച്ചു. ചികിത്സകൊണ്ട് യാതൊരു പുരോഗതിയും ഇല്ലാത്ത സാഹചര്യത്തില് ജീവവായുവും ഭക്ഷണവും നല്കുന്ന കുഴലുകള് നീക്കംചെയ്യാന് ജസ്റ്റിസ് ജെ.ബി. പര്ദിവാല അധ്യക്ഷനായ ബെഞ്ച് ഉത്തരവിട്ടു.
ദയാവധവുമായി ബന്ധപ്പെട്ട നടപടിക്രമങ്ങള് ലഘൂകരിക്കുന്നതിന് കൃത്യമായ ഒരു നിയമം നിര്മിക്കാന് കോടതി കേന്ദ്ര സര്ക്കാരിനോട് നിര്ദേശിക്കുകയും ചെയ്തു.
