യുവാക്കള്‍ക്കിടയില്‍ തൊഴിലില്ലായ്മ കുതിച്ചുയര്‍ന്നതിന് പിന്നില്‍ തന്റെ പദ്ധതിയാണെന്ന് ചാന്‍സലര്‍ റേച്ചല്‍ റീവ്‌സ് ഒടുവില്‍ സമ്മതിച്ചു. നാഷണല്‍ ഇന്‍ഷുറന്‍സ് വര്‍ധിപ്പിക്കാന്‍ പാടില്ലായിരുന്നുവെന്ന വാദങ്ങള്‍ ശരിയാണെന്നാണ് റേച്ചല്‍ റീവ്‌സ് സമ്മതിച്ചത്. തന്റെ ആദ്യ ബജറ്റിലെ വിവാദ നീക്കമാണ് തൊഴിലില്ലായ്മ വര്‍ധിക്കുന്നതില്‍ പ്രധാന സംഭാവന നല്‍കിയതെന്ന് ചാന്‍സലര്‍ പറയുന്നു. പ്രത്യേകിച്ച് യുവാക്കള്‍ക്കിടയില്‍ ഇത് കനത്ത ആഘാതമാണ് സൃഷ്ടിച്ചത്.
എന്നാല്‍ പൊതുസേവനങ്ങള്‍ക്കായി പണം ആവശ്യമായി വന്നിരുന്നുവെന്നാണ് ട്രഷറി സെലക്ട് കമ്മിറ്റി മുന്‍പാകെ ഇവര്‍ വാദിച്ചത്. എന്‍ഐസികള്‍ വര്‍ധിപ്പിച്ചതിന്റെ ആഘാതത്തിലാണ് ഇപ്പോഴും രാജ്യം. ബിസിനസുകള്‍ പുതിയ ജോലിക്കാരെ എടുക്കാന്‍ മടിക്കുകയാണ്. യുവാക്കളെ ഈ നീക്കം സാരമായി ബാധിക്കുകയും ചെയ്തു.
യുവാക്കള്‍ക്ക് ആവശ്യമായ വിദ്യാഭ്യാസവും, എംപ്ലോയ്‌മെന്റ്, ട്രെയിനിംഗ് ഇല്ലാത്തതാണ് തൊഴിലില്ലായ്മയ്ക്ക് മറ്റൊരു കാരണമെന്ന് ചാന്‍സലര്‍ പറഞ്ഞു. ഇത് പരിഹരിക്കാനുള്ള നടപടികള്‍ ഈ ഗവണ്‍മെന്റ് സ്വീകരിച്ചതായും റീവ്‌സ് അവകാശപ്പെട്ടു.
ഇതിനിടെ ജി7 രാജ്യങ്ങളില്‍ യുകെയില്‍ മാത്രമാകും പണപ്പെരുപ്പം 3 ശതമാനത്തിന് മുകളിലേക്ക് പോകുകയെന്ന് ഒഇസിഡി റിപ്പോര്‍ട്ട് മുന്നറിയിപ്പ് നല്‍കിയത് റീവ്‌സിന് മറ്റൊരു നാണക്കേടായി. ബ്രിട്ടനിലെ ജനങ്ങള്‍ക്ക് ഏറ്റവും വലിയ ജീവിതച്ചെലവ് സമ്മര്‍ദം നേരിടുമെന്നാണ് ഇത് വ്യക്തമാക്കുന്നത്.
