എന്എച്ച്എസ് ചികിത്സയ്ക്കുള്ള നീണ്ട കാത്തിരിപ്പു മൂലം കൂടുതല് പേര് സ്വകാര്യ ആശുപത്രിയില് ചികിത്സ തേടുന്നതായി റിപ്പോര്ട്ട്. ഹെല്ത്ത് വാച്ച് ഇംഗ്ലണ്ടിന്റെ റിപ്പോര്ട്ട് പ്രകാരം കഴിഞ്ഞ ഒരു വര്ഷത്തില് 16 ശതമാനം പേരാണ് സ്വകാര്യ സെക്ടര് സേവനം ഉപയോഗിച്ചുവെന്ന് കണ്ടെത്തിയത്. രണ്ടു വര്ഷം മുമ്പ് ഇതു 9 ശതമാനമായിരുന്നു. സമ്പന്ന വിഭാഗത്തില്പ്പെട്ടവരാണ് സ്വകാര്യ ചികിത്സയെ ആശ്രയിക്കുന്നത്. 80000 പൗണ്ടിലധികം വരുമാനമുള്ളവരില് 35 ശതമാനം കഴിഞ്ഞ വര്ഷം സ്വകാര്യ സേവനം ഉപയോഗിച്ചതായി പഠനം പറയുന്നു.
എന്എച്ച്എസില് മിക്കപ്പോഴും വൈദ്യ പരിശോധനകളും സ്കാനിങ്ങുകളും വൈകുന്നതു മൂലമാണ് പലരും ആദ്യം സ്വകാര്യ രംഗത്ത് പോകുന്നതും പരിശോധനാഫലങ്ങള് എന്എച്ച്എസിലേക്ക് നല്കി ഉടന് ചികിത്സ ലഭിക്കാന് ശ്രമിക്കുകയും ചെയ്യുന്ന പ്രവണതയുണ്ട്. സ്വകാര്യ മേഖലയില് ചില പരിശോധനകള് 48 മണിക്കൂറിനകം നടത്താന് സാധിക്കുന്ന സ്ഥാനത്ത് എന്എച്ച്എസ് കാത്തിരിക്കേണ്ടത് 18 ആഴ്ചകളാണ്. മാനസിക വിഷമവും വെയ്റ്റ് ലോസ് മരുന്നുകള്ക്കും കൂടുതല് പേര് സ്വകാര്യ സേവനം തേടുന്നു.
എന്എച്ച്എസ് ജിപികളുടെ ജോലിഭാരം കൂടുതലാണ്. എന്എച്ച്എസ് സേവനങ്ങള് മെച്ചപ്പെടുത്തേണ്ടത് അനിവാര്യമാണ്. മികച്ച സേവനം വേഗത്തില് ലഭ്യമാക്കിയില്ലെങ്കില് സാമ്പത്തികമായി പിന്നോക്കം നില്ക്കുന്നവര്ക്ക് നിരാശയാകും ഫലം. സ്വകാര്യ ആശുപത്രിയില് പണമുള്ളവര് ചികിത്സയ്ക്ക് പോകുമ്പോള് സാധാരണക്കാരുടെ കാത്തിരിപ്പ് നീളുകയാണ്.
