ലണ്ടനിലെ നോര്‍ത്ത് വെസ്റ്റ് മേഖലയിലെ ആംബുലന്‍സുകള്‍ക്ക് നേരെയുണ്ടായ ആസൂത്രിത തീവയ്പ്പ് മലയാളി സമൂഹത്തിലും ആശങ്ക പരത്തി. നിരവധി മലയാളികള്‍ താമസിക്കുന്ന പ്രദേശത്താണ് തിങ്കളാഴ്ച പുലര്‍ച്ചെ ആക്രമണം നടന്നത്. ജൂത സന്നദ്ധസംഘടനയായ 'ഹത്‍സോള'യുടെ നാല് ആംബുലന്‍സുകള്‍ക്കാണ് ആക്രമികള്‍ തീയിട്ടത്. ഇത് വിദ്വേഷ കുറ്റകൃത്യമാണെന്നാണ് മെട്രോപൊളിറ്റന്‍ പൊലീസിന്റെ വിലയിരുത്തല്‍.
പുലര്‍ച്ചെ 1:40ഓടെയാണ് സംഭവം നടന്നത്. ലണ്ടന്‍ എയര്‍ ഫോഴ്സിന്റെ ആറ് ഫയര്‍ എന്‍ജിനുകളും ഏകദേശം 40 അഗ്നിശമന സേനാംഗങ്ങളും ചേര്‍ന്ന് 3.06ഓടെയാണ് തീ നിയന്ത്രണവിധേയമാക്കിയത്. ആളപായമൊന്നും റിപ്പോര്‍ട്ട് ചെയ്തിട്ടില്ല. സംഭവത്തെത്തുടര്‍ന്ന് നിരവധി താമസക്കാരെ വീടുകളില്‍ നിന്ന് ഒഴിപ്പിക്കുകയും ഏകദേശം 30 പേരെ പ്രാദേശിക അഭയകേന്ദ്രത്തിലേക്ക് മാറ്റുകയും ചെയ്തു. മുന്‍കരുതലായി സമീപ പ്രദേശങ്ങള്‍ ഒഴിപ്പിക്കുകയും റോഡുകള്‍ അടയ്ക്കുകയും ചെയ്തിരുന്നു.
'സിസിടിവി ദൃശ്യങ്ങള്‍ പരിശോധിച്ചുവരികയാണ്. ഈ ഘട്ടത്തില്‍ മൂന്ന് പേര്‍ക്ക് ആക്രമണവുമായി ബന്ധമുള്ളതായി സംശയിക്കുന്നു. ഇതുവരെ ആരെയും അറസ്റ്റ് ചെയ്തിട്ടില്ല,' - പൊലീസ് സൂപ്രണ്ട് സാറാ ജാക്സണ്‍ അറിയിച്ചു. കൂടുതല്‍ വിവരങ്ങള്‍ ലഭിക്കുന്നവര്‍ മുന്നോട്ട് വരണമെന്നും പൊലീസ് അഭ്യര്‍ഥിച്ചു. വാഹനങ്ങള്‍ നശിപ്പിക്കപ്പെട്ട സംഭവത്തില്‍ വലിയ പ്രതിഷേധം ഉയരുന്നുണ്ട്.
