വലിയ തോതില്‍ പുതിയ വിമാന സര്‍വീസുകളും ദീര്‍ഘദൂര സര്‍വ്വീസുകളും തുടങ്ങാന്‍ കഴിയുന്ന തരത്തിലുള്ള വിപുലീകരണത്തിനായി ബ്രിസ്റ്റോള്‍ എയര്‍പോര്‍ട്ട്. വിമാനത്താവളാധികൃതര്‍ അനുമതിയപേക്ഷ സമര്‍പ്പിച്ചു. കൂടുതല്‍ യാത്രക്കാര്‍ എത്തുന്നതോടെ ടെര്‍മിനലുകളും വലുതാകും. കൂടാതെ പുതിയ ഷോപ്പുകള്‍, റെസ്റ്റോറന്റുകള്‍ എന്നിവയും ഒരു നീളം കൂട്ടിയ റണ്‍വേയുമാണ് 500 മില്യണ്‍ പൗണ്ടിന്റെ വികസന പദ്ധതിയില്‍ ഉള്‍പ്പെടുത്തിയിരിക്കുന്നത്.
ദീര്‍ഘദൂര വിമാനസര്‍വീസുകള്‍ക്ക് അനുകൂലമാകുന്ന തരത്തില്‍ റണ്‍വേയുടെനീളം വര്‍ദ്ധിപ്പിക്കുന്നത് ഉള്‍പ്പടെയുള്ള വികസന പദ്ധതികള്‍ക്ക് അനുമതി തേടി വിമാനത്താവളാധികൃതര്‍ നോര്‍ത്ത് സോമര്‍സെറ്റ് കൗണ്‍സിലിലാണ് അപേക്ഷ സമര്‍പ്പിച്ചിരിക്കുന്നത്. യൂറോപ്പിലും പുറത്തുമുള്ള വിവിധ മഹാനഗരങ്ങളിലേക്ക് ഇവിടെ നിന്നും സര്‍വ്വീസുകള്‍ ആരംഭിക്കാനാണ് ഉദ്ദേശ്യം എന്നാണ് ഈ അപേക്ഷയില്‍ പറയുന്നത്.
വടക്കെ അമേരിക്ക, മദ്ധ്യപൂര്‍വ്വദേശങ്ങള്‍, ഏഷ്യന്‍ രാജ്യങ്ങള്‍ എന്നിവിടങ്ങളിലേക്ക് പരിമിതമായ വിമാന സര്‍വ്വീസുകള്‍ നടത്തും. ഈ വികസനം പൂര്‍ത്തിയാവുന്നതോടെ, 2030 കളില്‍ 12 ദശലക്ഷം മുതല്‍ 15 ദശലക്ഷം വരെ യാത്രക്കാര്‍ക്ക് സേവനം നല്‍ക്കാന്‍ കഴിയുമെന്നാണ് വിമാനത്താവളാധികൃതര്‍ പ്രതീക്ഷിക്കുന്നത്.
നിലവില്‍ ഈ വിമാനത്താവളത്തിന്റെ സേവനം ഉപയോഗിക്കുന്നത് പ്രതിവര്‍ഷം ശരാശരി 10.8 ദശലക്ഷം യാത്രക്കാരാണ്. നിലവില്‍ പ്രതിവര്‍ഷം 85,990 ലാന്‍ഡിംഗുകളും ടേക്ക് ഓഫുകളും നടക്കുന്നിടത്ത്, വികസന പദ്ധതികള്‍ പൂര്‍ത്തിയാകുന്നതോടെ ഇത് ഒരു ലക്ഷമായി വര്‍ദ്ധിക്കും.
