കൊച്ചിയിലെ പഞ്ചനക്ഷത്ര ഹോട്ടലില് പോലീസ് നടത്തിയ മിന്നല് പരിശോധനയില് മയക്കുമരുന്നുമായി എട്ടുപേരെ പിടികൂടി. കൊക്കെയ്ന്, എം.ഡി.എം.എ, എക്സ്റ്റസി തുടങ്ങിയ മാരകമായ ലഹരിവസ്തുക്കള് ഇവരുടെ പക്കല് നിന്നും കണ്ടെടുത്തു.
ഇവന്റ് മാനേജ്മെന്റ് സ്ഥാപനം നടത്തുന്ന തിരുവനന്തപുരം സ്വദേശി ഷാജി ഫെര്ണാണ്ടോ (ഷോണ്-44), റസ്റ്ററന്റ് നടത്തുന്ന കലൂര് സ്വദേശി ഓസ്റ്റിന് ജോസ് (31), കലൂര് സ്വദേശി അഡ്വ. രോഹിത് നായര് (25), ബിസിനസുകാരനായ ആലുവ സ്വദേശി ജിനോ മുരളി, ആലപ്പുഴ സ്വദേശിയായ ന്യൂട്രീഷന് അക്ബര് ഷാ (30), പന്തളം സ്വദേശിനിയായ ദന്തഡോക്ടര് ബെന്സി റാവുത്തര് (29), ഫിസിയോ തെറപ്പിസ്റ്റായ കൊല്ലം സ്വദേശിനി സെയ്തലി ഫാത്തിമ (29), ഏവിയേഷന് വിദ്യാര്ഥിനിയായ കണ്ണൂര് സ്വദേശിനി അമല് റൗഫ് (26) എന്നിവരെയാണ് കടവന്ത്ര പോലീസും കൊച്ചി സിറ്റി ഡാന്സാഫും ചേര്ന്ന് പിടികൂടിയത്.
കടവന്ത്രയിലെ ഹോട്ടലില് പോലീസ് നടത്തിയ പരിശോധനയിലാണ് പിടിയിലായത്. ഹോട്ടലില് സ്ഥിരമായി മുറിയെടുത്ത് സംഘം ചേര്ന്ന് മയക്കുമരുന്ന് ഉപയോഗിച്ചിരുന്നതായി പോലീസ് പറഞ്ഞു. ഇവരുടെ പക്കല്നിന്നും അഞ്ചു ഗ്രാം ഹൈബ്രിഡ് കഞ്ചാവും 0.34 ഗ്രാം കൊക്കെയ്നും 0.36 ഗ്രാം മെത്താഫിറ്റമിനും 0.44 ഗ്രാം എക്സ്റ്റസി പില്ലും കണ്ടെടുത്തു. കൊച്ചി സിറ്റി പോലീസ് കമ്മിഷണര് കാളിരാജ് മഹേഷ് കുമാറിന്റെ നിര്ദേശമനുസരിച്ച് ഡി.ജെ. പാര്ട്ടി നടക്കുന്ന സ്ഥലങ്ങള് പോലീസ് നിരീക്ഷിക്കുന്നുണ്ടായിരുന്നു.
